Air Astana áýe kompaniiasy 5 jasar Insaf esimdi qyzdyń ata-anasyna 5 million teńge ótemaqy tóleýge mindetteldi. Bul jóninde Almaty qalalyq sotynyń baspasóz qyzmeti habarlady. Aryz Air Astana men áýejaiǵa qarsy berilgenimen, jaýapkershilik tek áýe kompaniiasyna júkteldi, dep habarlaidy Dalanews.kz.
Almaty qalasynyń Túrksib aýdandyq soty aýyr háldegi balany tasymaldaý kezinde zańbuzýshylyqtar oryn alǵanyn rastady. Is materialdaryna sáikes, Almatyǵa reis kelgen soń, komada jatqan, ózdiginen qozǵala almaityn qyzdy invalidterge arnalǵan arbamen tasymaldaý usynylǵan, bul áreket meditsinalyq talaptarǵa sai kelmegen.
Qyzdyń ata-anasy aldyn ala dárigeri bar jeke reanimobil shaqyrǵan. Alaida áýejai ákimshiligi bul kólikti ótkizýge ruqsat bermegen.
Insafty ambýlift arqyly tasymaldaǵan — bul qural múmkindigi shekteýli jolaýshylarǵa arnalǵanymen, aýyr haldegi naýqastardy tasymaldaýǵa beiimdelmegen.
Neirohirýrg mamannyń qorytyndysyna sáikes, qyz ózdiginen qozǵala almaityndyqtan, shekaralyq baqylaýdan meditsinalyq bólim arqyly ótýi tiis edi. Alaida sot derekterinde kórsetilgendei, shekara baqylaýynda Insaftyń kózindegi tańǵysh kúshtep sheshilip, sýretke túsirilgen. Bir aidan keiin qyz kóz jumdy.
Sot bul jaǵdaiǵa qatysty: aviakompaniia men áýejai arasyndaǵy úilestirýdiń bolmaýy, sonyń ishinde shekaralyq jáne kedendik baqylaýdaǵy nemquraidylyq Insaftyń densaýlyǵynyń kúrt nasharlaýyna áser etti degen qorytyndyǵa keldi.
Bul oqiǵaǵa qatysty "Kýrsiv" basylymy buǵan deiin eki taraptyń jaýapkershilikti bir-birine júktegenin jazǵan bolatyn. Almaty áýejaiy Air Astana meditsinalyq jaǵdaidaǵy jolaýshy týraly aldyn ala eskertpedi dese, áýe kompaniiasy kerisinshe, eskertkenin, biraq sonda da arbanyń usynylǵanyn málimdegen.
