Air Astana ەۋە كومپانيياسى 5 جاسار ينساف ەسٸمدٸ قىزدىڭ اتا-اناسىنا 5 ميلليون تەڭگە ٶتەماقى تٶلەۋگە مٸندەتتەلدٸ. بۇل جٶنٸندە الماتى قالالىق سوتىنىڭ باسپاسٶز قىزمەتٸ حابارلادى. ارىز Air Astana مەن ەۋەجايعا قارسى بەرٸلگەنٸمەن, جاۋاپكەرشٸلٸك تەك ەۋە كومپانيياسىنا جٷكتەلدٸ, دەپ حابارلايدى Dalanews.kz.
الماتى قالاسىنىڭ تٷركسٸب اۋداندىق سوتى اۋىر حەلدەگٸ بالانى تاسىمالداۋ كەزٸندە زاڭبۇزۋشىلىقتار ورىن العانىن راستادى. ٸس ماتەريالدارىنا سەيكەس, الماتىعا رەيس كەلگەن سوڭ, كومادا جاتقان, ٶزدٸگٸنەن قوزعالا المايتىن قىزدى ينۆاليدتەرگە ارنالعان اربامەن تاسىمالداۋ ۇسىنىلعان, بۇل ەرەكەت مەديتسينالىق تالاپتارعا ساي كەلمەگەن.
قىزدىڭ اتا-اناسى الدىن الا دەرٸگەرٸ بار جەكە رەانيموبيل شاقىرعان. الايدا ەۋەجاي ەكٸمشٸلٸگٸ بۇل كٶلٸكتٸ ٶتكٸزۋگە رۇقسات بەرمەگەن.
ينسافتى امبۋليفت ارقىلى تاسىمالداعان — بۇل قۇرال مٷمكٸندٸگٸ شەكتەۋلٸ جولاۋشىلارعا ارنالعانىمەن, اۋىر حالدەگٸ ناۋقاستاردى تاسىمالداۋعا بەيٸمدەلمەگەن.
نەيروحيرۋرگ ماماننىڭ قورىتىندىسىنا سەيكەس, قىز ٶزدٸگٸنەن قوزعالا المايتىندىقتان, شەكارالىق باقىلاۋدان مەديتسينالىق بٶلٸم ارقىلى ٶتۋٸ تيٸس ەدٸ. الايدا سوت دەرەكتەرٸندە كٶرسەتٸلگەندەي, شەكارا باقىلاۋىندا ينسافتىڭ كٶزٸندەگٸ تاڭعىش كٷشتەپ شەشٸلٸپ, سۋرەتكە تٷسٸرٸلگەن. بٸر ايدان كەيٸن قىز كٶز جۇمدى.
سوت بۇل جاعدايعا قاتىستى: اۆياكومپانييا مەن ەۋەجاي اراسىنداعى ٷيلەستٸرۋدٸڭ بولماۋى, سونىڭ ٸشٸندە شەكارالىق جەنە كەدەندٸك باقىلاۋداعى نەمقۇرايدىلىق ينسافتىڭ دەنساۋلىعىنىڭ كٷرت ناشارلاۋىنا ەسەر ەتتٸ دەگەن قورىتىندىعا كەلدٸ.
بۇل وقيعاعا قاتىستى "كۋرسيۆ" باسىلىمى بۇعان دەيٸن ەكٸ تاراپتىڭ جاۋاپكەرشٸلٸكتٸ بٸر-بٸرٸنە جٷكتەگەنٸن جازعان بولاتىن. الماتى ەۋەجايى Air Astana مەديتسينالىق جاعدايداعى جولاۋشى تۋرالى الدىن الا ەسكەرتپەدٸ دەسە, ەۋە كومپانيياسى كەرٸسٸنشە, ەسكەرتكەنٸن, بٸراق سوندا دا اربانىڭ ۇسىنىلعانىن مەلٸمدەگەن.
