الەۋمەتتىك جەلى قولدانۋشىلارىنىڭ ءبىرى Air Astana اۋە كومپانياسىنىڭ بولىمشەسىندە قازاق ءتىلىنىڭ قولدانىلماۋىنا قاتىستى شاعىمداندى. ونىڭ ايتۋىنشا، اقپارات تاقتالارى مەن جازبالاردا مەملەكەتتىك ءتىل ەسكەرىلمەگەن، دەپ حابارلايدى Dalanews.kz.
جەلى قولدانۋشىسىنىڭ سوزىنشە، ىستانبۇل اۋەجايىنداعى Air Astana بولىمشەسىندە اقپارات بىرنەشە تىلدە بەرىلگەن. الايدا ونىڭ رەتى ساقتالماعان، كەيبىر جازبالاردا قازاق ءتىلى مۇلدە قولدانىلماعان.
“ءۇش تىلدە جازىپ قويىپتى. قازاقتارعا قىزمەت كورسەتپەيدى-اۋ دەپ ويلادىم. ءبىرىنشى تۇرىكشە، ەكىنشى قازاقشا، ءۇشىنشى اعىلشىنشا جازىپ قويسا تۇسىنەتىن ەدىم. بۇل رەسەيلىك ەمەس، ءوزىمىزدىڭ قازاقستاندىق كومپانيا ەمەس پە؟
ودان بولەك رەگيستراسيا جاسايتىن جەردە تابلولارىندا اعىلشىنشا جانە ورىسشا جازىپ قويىپتى. قانىم قارايعانى-اي”، - دەپ جازدى Zhaksytaev ەسىمدى جەلى قولدانۋشىسى.
راسىمەن، اۆتور جەلىدە جاريالاعان اقپاراتتىق تاقتادا قازاق ءتىلى قولدانىلماعانى كورىنەدى. بۇل جايت الەۋمەتتىك جەلىدە قىزۋ تالقىلانىپ جاتىر.
ايتا كەتەيىك، قازاقستاندا مەملەكەتتىك ءتىل –قازاق ءتىلى. سوندىقتان قوعامدا وتاندىق كومپانيالار، اسىرەسە ۇلتتىق تاسىمالداۋشىلار قىزمەت كورسەتۋ بارىسىندا قازاق تىلىنە باسىمدىق بەرۋى كەرەك دەگەن تالاپ ءجيى كوتەرىلەدى.
قازىرگى ۋاقىتتا Air Astana اتالعان جاعدايعا قاتىستى رەسمي تۇسىنىكتەمە بەرگەن جوق.
