Ystambuldaǵy Aiia-Sofiia meshitinde Bibliiadan úzindi oqyǵany úshin ustalǵan eki Resei azamaty 17 shildede elderine deportatsiialanady, dep habarlaidy dalanews.kz.
Bul týraly reseilik TASS agenttigi habarlady. Buǵan deiin Reseidiń Ystambuldaǵy Bas konsýldyǵy Viktoriia men Igor Filonovtardyń politsiia tarapynan ustalyp, keiin deportatsiialyq ortalyqqa jetkizilgenin málimdegen. Diplomatiialyq ókildik olardyń isi baqylaýda ekenin habarlady.
Túrkiialyq BAQ-tyń málimetinshe, erli-zaiypty 13 shilde kúni qazirgi ýaqytta meshit retinde qyzmet etetin Aiia-Sofiia ǵimaratynda Bibliiadan úzindi oqyǵany úshin ustalǵan.
Basylymdardyń jazýynsha, olarǵa qatysty Túrkiia Qylmystyq kodeksiniń «óshpendilik pen arazdyqty qozdyrý nemese qoǵamdy qorlaý» babymen qylmystyq is qozǵalǵan. Alaida Túrkiia biligi bul aqparatty ázirge resmi túrde rastaǵan joq.
TASS agenttiginiń habarlaýynsha, Ystambul politsiiasyndaǵy derekkózder oqiǵanyń bolǵanyn rastaǵanymen, qosymsha túsinikteme berýden bas tartqan. Sondai-aq provintsiialyq ákimdik pen Kóshi-qon basqarmasy da bul jaǵdaiǵa qatysty pikir bildirmegen.
Ustalǵandar toqtaǵan qonaqúi ákimshiligi de qoldanystaǵy zańnamaǵa sáikes qonaqtar týraly málimetti úshinshi tulǵalarǵa berýge bolmaitynyn aityp, olardyń qaida ekeni týraly aqparat taratýdan bas tartqan.
Eske salaiyq, osydan bir jarym ai buryn Ystambul soty Aiia-Sofiiada Vizantiianyń qos basty qyrany beinelengen jáne «Pravoslavie nemese ólim» degen jazýy bar týdy ilgen eki Grekiia azamatyn 10 aiǵa shartty túrde bas bostandyǵynan aiyrý jazasyna kesip, olarǵa bes jyldyq synaq merzimin belgilegen.
