Mádeniet jáne aqparat ministri Aida Balaeva qaitys bolǵannan keiingi donorlyqty damytýdyń mańyzdylyǵy týraly pikir bildirip, ózi aǵzalaryn donorlyqqa berýge kelisim beretinin aitty, dep habarlaidy dalanews.kz.
Ministrdiń aitýynsha, bul oi oǵan «Habar» agenttigi túsirgen «4739» derekti filmin kórgennen keiin kelgen.
Aida Balaeva qazirgi tańda Qazaqstanda 4739 adam aǵza transplantatsiiasyn kútip otyrǵanyn, olardyń arasynda 125 bala baryn atap ótti. Onyń sózinshe, elimizde transplantatsiialardyń shamamen 90 paiyzy tiri týystyq donorlardyń qatysýymen jasalady, al qaitys bolǵannan keiingi donorlyqtyń úlesi 10 paiyzǵa da jetpeidi.
Sonymen birge ministr donor bolý nemese bolmaý – ár adamnyń jeke tańdaýy ekenin aitty.
«Men aǵzalarymdy donorlyqqa berýge kelisim beretinimdi jaýapkershilikpen atap ótkim keledi. Sebebi bir adamnyń sheshimi basqa bir adamǵa ómir súrýge múmkindik berýi múmkin», – dep jazdy Aida Balaeva.
Ministrdiń pikirinshe, bul máseleni qorqynyshpen nemese qysymmen emes, ózara túsinistikpen, jaýapkershilikpen jáne adam ómirine degen qurmetpen talqylaý qajet.
Sondai-aq ol transplantatsiiany kútip otyrǵan árbir adamnyń artynda ómirge degen úlken úmit turǵanyn aityp, sol úmitti úzbeý qoǵamnyń ortaq adamgershilik mindeti ekenin jetkizdi.
