Vitse-premer Serik Jumanǵarinniń tóraǵalyǵymen ótken Úkimet otyrysynda aýyl sharýashylyǵynda agrodrondardy qoldaný tájiribesin qoldaný men keńeitýdiń tiimdiligi qaraldy, dep habarlaidy Dalanews.kz.
Álemniń 100-den astam elinde aýylsharýashylyq drondaryn qoldanýdyń halyqaralyq tájiribesi jerústi búrikkish-tehnikanyń ornyna ushqyshsyz ushatyn apparattardy paidalanýdyń eleýli artyqshylyǵyn kórsetedi. Búginde dúnie júzinde agrodrondardyń kómegimen 500 mln gektardan astam egistik óńdeldi. Sýdy únemdep jumsaý esebinen álem boiynsha shamamen 210 mln tonna sýdy únemdeýge, SO2 emissiiasyn 25 mln tonnaǵa qysqartýǵa múmkindik týdy. Aýylsharýashylyq drondary jetýi qiyn jerlerdi óńdep, zertteýge múmkindik beredi. Olar kez-kelgen aýa-raiynda, táýlik boiyna, jańbyr kezinde jáne túnde de jumys isteidi.
"Mysaly, ózdiginen júretin búrikkish gektaryna 150 litr sý jumsaidy, 5 myń gektarǵa shamamen 750 myń litr sý qajet. Al, dronǵa dál osyndai aýmaqty óńdeý úshin 50 myń litr qajet, ol 15 ese az. Sonymen qatar jumys kezinde ózdiginen júretin búrikkish sorap qurylǵyny basyp ketedi, bul fermerge ónimniń shamamen 6%-yn joǵaltýyna ákeledi. UUA daqyldarǵa mundai ziian keltirmeidi", — dedi keńeste agrodrondardy paidalanatyn kompaniianyń ókili Sanjar Nurǵazinov.
Qazaqstanda ósimdikterdiń ziiankesteri men qaýipti aýrýlaryn zertteý jáne emdeý úshin ushqyshsyz ushý apparattaryn paidalanýdy keńeitý maqsatynda Aýyl sharýashylyǵy ministrligi qytailyq Eavision kompaniiasymen 80 agrodron ákelýge arnalǵan memorandýmǵa qol qoidy. Bul UUA aýyl sharýashylyǵy taýaryn óndirýshiler arasynda satylatyn bolady. Budan basqa, "Sunkar eavision International LLP" JShS Birlesken qazaqstan-qytai kásiporny quryldy, ol "Alataý" aqparattyq tehnologiialar parki AEA aýmaǵynda otandyq drondardy jinaýdy júzege asyrady.
"Óńirlerdiń ÁKK-men birlesip Túrkistan, Taraz, Abai jáne Jetisý oblystarynda agrodrondardyń demonstratsiialyq jáne servistik ortalyqtaryn ashý máselesi pysyqtaldy. Úsh oqý ornynyń bazasynda: Talǵar politehnikalyq kolledji, Semei qalasyndaǵy IT-tehnologiialar kolledji jáne Túrkistan oblysy Qaplanbek aýylyndaǵy aýyl sharýashylyǵy kolledjiylt qurastyrýshylar men ushqyshtardy oqytý máselesi sheshildi", — dep atap ótti aýyl sharýashylyǵy vitse-ministri Ermek Kenjehanuly.
Sonymen qatar ziiankesterdiń qonystaný oryndaryn zertteý jáne emdeý úshin qajetti baǵdarlamalyq qamtamasyz etýdi qurý boiynsha jumystar júrgizilýde. "Ǵarysh Sapary" AQ – "FitoKZ" GAJ aqparattyq júiesinde júrgizilgen óńdeýlermen zertteý is-sharalaryn bailanystyrý kózdelgen.
Serik Jumanǵarin kezdesýde Tsifrlyq damý jáne aeroǵarysh ónerkásibi ministrliginiń aldyna agrodrondardy basqarý úshin óziniń baǵdarlamalyq jasaqtamasyn ázirleý múmkindigin zertteý tapsyrmasyn qoidy.
Keńes qorytyndysy boiynsha Serik Jumanǵarin AShM-ge 2025 jyldyń aqpan aiynyń sońyna deiin qajetti baǵdarlamalyq qamtamasyz etýdi irikteýdi nemese ázirleýdi, servistik ortalyqtar qurýdy, negizinen aýyl jastarynan UUA-men jumys isteitin mamandardy daiarlaýdy, QazAgroQarjyǵa – qolda bar qarajat sheńberinde fermerlerdiń satyp alý úshin qoldaý sharalaryn pysyqtaýdy, aýyl sharýashylyǵynda agrodrondardy damytý jáne engizý jónindegi Jol kartasyn ázirleýdi tapsyrdy.
