Qoǵamdyq saiasat institýty saýalnamasynyń nátijeleri 2026 jylǵy 23 tamyzda ótetin Quryltai sailaýy týraly halyqtyń habardar bolý deńgeii joǵary ekenin kórsetedi, dep habarlaidy dalanews.kz.
Zertteý derekterine sáikes, respondentterdiń 89,4% aldaǵy sailaý týraly habardar («Siz 2026 jylǵy 23 tamyzda Quryltai sailaýy ótetini týraly bilesiz be?»): 55,2% sailaý týraly tolyq habardar ekenin, taǵy da 34,2% sailaý týraly estigenin, biraq egjei-tegjeili bilmeitinin málimdedi.
Quryltai sailaýy týraly habardar bolý deńgeii respondentterdiń jas ereksheligine tikelei statistikalyq táýeldi ekeni baiqalady: respondenttiń jasy ulǵaiǵan saiyn onyń sailaý týraly habardar bolý deńgeii de arta túsedi. Sailaý týraly habardar bolý deńgeii aýyl turǵyndary arasynda joǵary.
Áleýetti elektoraldy belsendilik kórsetkishi de azamattardyń daýys berýge daiyndyq deńgeiiniń joǵary ekenin kórsetedi. Zertteý nátijelerine sáikes, respondentterdiń 72,3% Quryltai sailaýyna qatysýǵa nietti ekenin málimdedi («Siz 2026 jylǵy 23 tamyzda ótetin Quryltai sailaýynda daýys berýdi josparlap otyrsyz ba?»). Sonymen qatar, respondentterdiń 11,9% daýys berýge qatysýdy josparlamaitynyn málimdedi. Al 15,8% áli naqty sheshim qabyldamaǵan, onyń ishinde jaýap berýge qinalǵan respondentterdiń 0,5%-y bar.
Áleýetti elektorattyń basty erekshelikteriniń biri onyń sabaqtastyǵy bolyp otyr. Atap aitqanda, sailaýǵa qatysýǵa nietti respondentterdiń 87,6% 2026 jylǵy 15 naýryzda ótken jańa Konstitýtsiiany qabyldaý jónindegi respýblikalyq referendýmǵa da qatysqan («Siz tómende kórsetilgen sailaý naýqandarynyń qaisysyna qatystyńyz/daýys berdińiz?»). Bul eldegi negizgi saiasi naýqandarǵa únemi qatysatyn azamattardyń turaqty toby qalyptasqanyn kórsetedi.
Sailaýǵa qatysýǵa nietti azamattardyń elektoraldyq tańdaýy boiynsha «Ádilet» partiiasy alda keledi. Atalǵan partiiaǵa respondentterdiń 67,3% daýys berýge daiyn ekenin bildirdi («Siz Quryltai sailaýynda qai partiiaǵa daýys beresiz?»). Partiiany qoldaý deńgeii 36-60 jastaǵy respondentter, aýyl turǵyndary arasynda joǵary ekeni baiqalady. Atap óterligi, osy partiiany qoldaityndar sailaýǵa qatysýǵa nietti respondentter arasynda shoǵyrlanǵan.
Ekinshi orynǵa 6,2% nátijesimen «Aýyl» partiiasy ornalasty. Ári qarai «Respublica» – 5,5%, «Aq jol» – 4,8%, JSDP – 4,3%, QHP – 3,9%, «Baitaq» – 1,1% kórsetkishterimen jaiǵasty.
Al respondentterdiń 1,6% barlyq partiialarǵa qarsymyn dep daýys berýdi niet etse, 5,3% áli sheshim qabyldamaǵanyn aitty.
Taldaý nátijeleri partiiany tańdaýǵa yqpal etetin negizgi faktor («Joǵaryda kórsetilgen partiialardyń birine daýys berýińizge negizgi sebep qandai?», respondenttiń birneshe jaýap nusqasyn tańdaý múmkindigi boldy) – onyń bastamalaryna beriletin oń baǵa ekenin kórsetti, bul jaýapty respondentterdiń 44,4% tańdaǵan, ekinshi orynda – respondentterdiń belgili bir partiiamen turaqty bailanysty sezinýi ( «Men – osy partiianyń jaqtasymyn» – 29,2%). Odan keiin «Qazaqstannyń keleshegi osy partiiamen bailanysty» (25,3%) jáne «Partiianyń sailaýshylarmen jumys isteý tásili maǵan unaidy» (14,7%) degen pikir jii kezdesedi.
Jalpy alǵanda, zertteý nátijeleri azamattardyń aldaǵy Quryltai sailaýyna degen yntasynyń joǵary deńgeide ekenin jáne elektoraldyq jumyldyrýdyń jetkilikti dárejede qalyptasqanyn kórsetedi.
Saýalnamany Qoǵamdyq saiasat institýty 2026 jylǵy 7-27 shilde aralyǵynda ulttyq reprezentativti irikteme negizinde júrgizdi. Irikteme kólemi – 18 jastan asqan 8000 respondent (17 oblys, Astana, Almaty, Shymkent qalalary). Irikteme qateligi – ±1,19%. Derekterdi jinaý ádisi – jappai saýalnama (face-to-face). Qoǵamdyq saiasat institýty derekterdi QR «Qazaqstan Respýblikasyndaǵy sailaý týraly» Konstitýtsiialyq zańyna sáikes QR Ortalyq sailaý komissiiasyn 2026 jylǵy 4 shildedegi № KQ--26/14 jazbasha habardar etý negizinde jariialaidy.
