«Ádil sóz» halyqaralyq sóz bostandyǵyn qorǵaý qorynyń prezidenti bolyp qazaqstandyq jýrnalist ári media sarapshy Nazira Darimbet sailandy, dep habarlaidy dalanews.kz.
Qordyń málimetinshe, Nazira Darimbettiń táýelsiz jýrnalistikada kópjyldyq tájiribesi bar. Sonymen qatar ol mediany damytý jáne sóz bostandyǵyn qorǵaý baǵytyndaǵy halyqaralyq jobalardy júzege asyrýǵa qatysqan.
Jańa prezidenttiń aitýynsha, búginde Qazaqstandaǵy jýrnalister sot jáne ákimshilik qysymmen qatar, jańa tsifrlyq qaýip-qaterlerge de tap bolyp otyr.
«Bul syn-qaterlerge jýrnalisterdi qorǵaýdyń zamanaýi tetikterin qalyptastyrý, kásibi qaýymdastyqtyń birligin nyǵaitý jáne halyqaralyq yntymaqtastyqty damytý arqyly jaýap berýimiz qajet. Qordyń osy jyldar ishinde qalyptastyrǵan úzdik tájiribesin saqtai otyryp, onyń jumysyn qazirgi zaman talaptaryna sai jańa deńgeige kóterý mańyzdy. Bul rette qordyń negizin qalaýshy ári alǵashqy basshysy Tamara Kaleeva qalyptastyrǵan qaǵidattar men standarttarǵa súienemiz», – dedi Nazira Darimbet.
«Ádil sóz» halyqaralyq qory 1999 jyly qurylǵan. Uiym Qazaqstandaǵy sóz bostandyǵyn qorǵaý, jýrnalisterdiń quqyqtaryn qoldaý jáne media salasyndaǵy zańnamany jetildirý baǵytynda jumys isteidi.
Eske salaiyq, osy aidyń basynda qordyń burynǵy prezidenti Karla Jamanqulova qyzmetinen ketetinin málimdegen bolatyn.
