Ózbekstannyń halyq aqyny Jamol Kamol (Kamolov) el prezidenti Shavkat Mirziiaevten Tashkenttegi halyqaralyq áýejaiǵa birinshi prezident Islam Kárimovtiń esimin berý týraly jarlyqtyń kúshin joiýyn surady.
«Meniń pikirimshe, Islam Kárimovtiń esimin ulyqtaý týraly qujat asyǵys qabyldanǵan», — dep jazdy 77 jastaǵy aqyn. Kárimovtiń esimi beriletin nysandar sany óte kóp — «murajailar, saiabaqtar, joǵarǵy oqý oryndary, eskertkishter, uiymdar men kósheler».
«Osy oryndy ma? Onyń esimin Tashkent halyqaralyq áýejaiyna berý — artyq ketkendik bolar», — dedi ol Eltuz.com saityna.
Ózbekstan prezidenti Shavkat Mirziiaev 25 qańtarda respýblikanyń alǵashqy prezidenti Islam Kárimovtiń esimin ulyqtaý týraly jarlyqqa qol qoidy. Qujat boiynsha, eldegi birqatar nysan men mekemege sonyń aty beriledi. Olardyń arasynda Tashkent tehnikalyq ýniversiteti, Asaktaǵy avtomobil zaýyty, Ferǵanadaǵy Óner saraiy, Tashkenttegi halyqaralyq áýejai bar.
Onyń ústine, prezident jarlyǵyna sáikes, Ózbekstanda jyl saiyn Kárimovtiń týǵan kúni (30 qańtar) atap ótiledi, al 2 qyrkúiek — Birinshi prezidentti eske alý kúni dep jariialandy.
Ózbekstandy 26 jyl bilegen Islam Kárimov 2016 jyly 2 qyrkúiekte 78 jasynda qaitys boldy.
