Májilistiń burynǵy depýtaty ári zańger Abzal Quspan Qashaǵan jobasynyń operatoryn basqaryp otyrǵan tulǵalardy qylmystyq jaýapkershilikke tartý yqtimaldyǵyna qatysty pikir bildirdi. Onyń aitýynsha, milliardtaǵan aiyppuldardyń ózi munai kompaniialaryn ekologiialyq talaptardy saqtaýǵa májbúrlei almai otyr, dep habarlaidy dalanews.kz.
Abzal Quspannyń sózinshe, áldeqaida tiimdi shara – joǵary basshylyqtyń jeke jaýapkershiligin kúsheitý. Onyń ishinde qylmystyq jaýapkershilik te bolýy tiis.
«Laýazymdy tulǵa qabyldaǵan sheshimi úshin ákimshilik nemese tipti qylmystyq jaýapkershilikke tartylýy múmkin ekenin túsinse, onyń ekologiialyq talaptardy saqtaý máselesine degen kózqarasy túbegeili ózgeredi», – dedi ol.
Qazirgi tańda Qazaqstan men North Caspian Operating Company (NCOC) konsortsiýmy ekologiialyq aiyppulǵa qatysty sot daýyn jalǵastyryp jatyr. Daýdyń somasy shamamen 5 mlrd dollardy quraidy.
Buǵan deiin Ádilet ministrligi NCOC-tyń atqarýshy direktory Djankarlo Rýige zań talaptary oryndalmaǵan jaǵdaida ákimshilik jáne qylmystyq jaýapkershilikke tartylýy múmkin ekenin eskertkeni habarlanǵan bolatyn.
Abzal Quspan kez kelgen qylmystyq qýdalaý zań talaptary men naqty dálelderge negizdelýi tiis ekenin atap ótti. Onyń pikirinshe, bul investorlarǵa qysym jasalyp jatyr degen pikirdiń týyndaýyna jol bermeý úshin mańyzdy.
Aita keteiik, quramyna Shell, Eni, TotalEnergies, ExxonMobil, CNPC, Inpex jáne «QazMunaiGaz» kiretin NCOC konsortsiýmy ekologiialyq aiyppuldy negizsiz dep sanaidy. Qazirgi ýaqytta bul daý halyqaralyq arbitrajda qaralyp jatyr. Kompaniia buǵan deiin sot talqylaýy aiaqtalǵanǵa deiin aiyppuldy tólemeitinin málimdegen.
