QR Prezidenti Q.TOQAEV myrzaǵa
Bir top ziialy qaýym ókilderiniń atynan
AShYQ HAT
Qurmetti Qasym-Jomart Kemeluly!
Siz halyqty jańa dáýir – jańa Qazaqstanǵa bastap kelesiz. Qazirgi jaǵdaiǵa bailanysty «estitin memleket», jańa kezeń, taza, ádiletti qoǵam qurýǵa degen senim bizdiń úmitimizdi oiatty. Elimiz ben jerimiz úshin, Memleketimizdiń bolashaǵy úshin jasap jatqan eńbegińizge rizashylyǵymyzdy bildiremiz.
Jan saýǵa suraý qazaq halqynyń ejelden kele jatqan ata salty, eger el aqsaqaldary, aqyndary ótinish jasaǵanda odan eshbir han attap ketpegen. Siz de ata saltyn saqtap, Qazaqstannyń halyq jazýshysy, Qazaqstannyń Eńbek Eri, memleket jáne qoǵam qairatkeri Ábish Kekilbaevtyń inisi Ǵalymjan Niiazovtyń taǵdyryna arasha túsedi dep senemiz.
Mańǵystaý óńiriniń bolashaǵynan zor úmit kúttiretin bir azamaty jazyqsyzdan jazyqsyz, qamaýǵa alyndy. Qańtar oqiǵasy aldynda Jańaózen qalasynda gazǵa bailanysty halyq mitingke shyqqanyn jaqsy bilesiz. Sol kezde gazdyń baǵasyn negizsiz kóterdiń degen jeleýmen Mańǵystaý oblysy ákiminiń orynbasary Ǵalymjan Niiazov qylmystyq jaýapkershilikke tartylyp, kúdikti retinde 4 ai úi qamaqta otyr.
Biraq ol gaz baǵasyn kótermek túgili, oǵan aralasa da almaidy. Óitkeni, osy kúnge deiin munai, gaz salasy belgili bir toptyń ǵana yqpalynda bolǵan. Sondyqtan bul oryn alǵan Qańtar oqiǵasyna jaýapty adamdardy qorǵap qalý úshin barlyq kináni bir adamǵa jaba salýdy maqsat etip otyr.
Ǵalymjan Niiazov – Mańǵystaý óńiriniń tól perzenti. Ol Aqtaý qalasynyń ákimi bolyp taǵaiyndalǵanda jigerli jas oblys ortalyǵyn kórkeitýge kóp eńbek sińirdi.
Uiymdastyrýshylyq qarym-qabiletin, kúsh-jigerin aiamai sarp etip, el úmitin aqtady. Qala kósheleri kóriktendirilip, turǵyn úi qurylysy jedel qarqynmen damydy. Aqtaý qalasynyń basshylyǵyndaǵy osyndai óreli isteri men batyl sheshimderi eskerilip, Ǵalymjan oblys ákiminiń orynbasary qyzmetine taǵaiyndaldy.
Ol bul jaýapkershiligi joǵary qyzmetke de óziniń jastyq jigeri men uiymdastyrýshylyq qabilet-karymyn aianbai jumsap, barlyq qyrynan kórsete bildi. Qańtar aiynyń basynda gaz baǵasyn kúrt qymbattatý týraly sheshimniń shyǵýyna oblys ákiminiń orynbasary Ǵalymjan Niiazovtyń eshqandai tikelei de, janama da qatysy bolmaǵan. Jalpy, bólshek saýdadaǵy baǵalardy retteýmen oblys ákimdigi emes, monopoliiaǵa qarsy basqarma ainalysatynyn eskerý kerek. Sondyqtan oblys ákiminiń orynbasary, ósip kele jatqan jas kadr – Ǵalymjannyń zańsyz qamaýǵa alynýy, jigerli jastyń naqaqtan jalaly bolyp otyrǵany eskerilse eken deimiz.
Qurmetti Qasym-Jomart Kemeluly!
«Elim-qazaǵym!» dep dúnieden ótken zamanymyzdyń zańǵar tulǵasy Ábish Kekilbaevtyń inisin esh negizsiz tar zyńdanǵa qamasaq, bul arymyzǵa syn emes pe?
