Aýdan turǵyny aýrýhanadan shyǵyp, esik pen tórdei djipine jaiǵasqaly jatqan oblys ákimin sol sátte "sotkisine" túsirip, shaǵymyn betine aitypty.
«Ákim Ábdiqalyqova, siz hannyń qyzysyz ba? Nege kósheni japtyrasyz?!» dep ashynǵan aýdan turǵynyna oblys ákimi jarytyp jaýap bermei, kóligine otyryp kete barady.
Jańaqorǵanǵa jumys saparymen barǵan ákim artynsha kósheni japtyrǵan adamdy lezde tapqanyn jariia etti. Ol – ýchaskilik politsiia eken dep habarlaidy Dalanews.kz.
Áleýmettik jelide qarsha boraǵan synnyń astynda qalǵan Ábdihalyqovaǵa Jańaqorǵan aýdanynyń ákimi Sultan Maqashov ara tústi.
«Joǵarydaǵy týyndaǵan máselege bailanysty túsinikteme. Birinshiden oblys ákimi árdaiym aýdanǵa sapary kezinde, maǵan artyqshylyq jasap, turǵyndardyń júris turysyna kedergi keltirmeiik, joldar jabylmasyn dep únemi tapsyryp júr. Sol sebepti respýblikalyq mańyzdaǵy jolmen ilesip júrgen jol patrýldik avtokólikti de eldi meken shekarasynan tysqa qaldyryp ketedi. Ekinshiden oblys ákimi marshrýttary boiynda meniń nemese aýdan ákiminiń apparatynan kóshelerdi jabý týraly politsiiaǵa tapsyrma berilgen joq. Kóshelerde kóliktermen qatarlasyp jol erejelerine sáikes júrdi. Men oblys basshysymen birge aýdandyq aýrýhana aldyndaǵy jalpy turaqqa toqtadyq.
Aýrýhana ishinde júrgen sátte, sol aýmaqtyń ýchaskilik inspektory, aýrýhanaǵa jaqyn kóshe qiylysynda qoǵamdyq gazel avtokóligin toqtatqan, kóshe jabyq emes, basqa kólikter júrip jatyr. Sol sátte politsiia bólimi basshysynyń orynbasary,ýchaskilik inspektoryna kólikti nege toqtatasyń, qozǵalysty toqtatpańdar dep ratsiia arqyly tapsyrma bergen, biraq ol tapsyrma oryndalmaǵan.
Bir jaǵynan, inspektordyń aitýy boiynsha, men oblys ákiminiń kóligi aýrýhana aldynan qozǵalaiyn dep turǵan siiaqty bolǵasyn, ótkizip jibergenshe toqtata turaiyn, keptelis bolyp qalar dep sheshtim dep otyr.
Kóshe qozǵalysynyń qaýipsizdigi olardyń da mindeti. Eshkimge jasyryn emes, tal túste ereje buzyp uitqyp júrgen, júgensiz júrgizýshiler de az emes. Oblys basshysynyń qaýipsiz shyǵyp ketýin oilaǵan shyǵar. Qalai bolǵanda da kóshelerdiń jabylmaǵany anyq.
Úshinshiden eki- úsh aida bir keletin aimaq basshysyn kósheni jappasaq ta, toqtaǵan jerinen qaýipsiz jolǵa shyǵaryp jibere almasaq bizdiń kim bolǵanymyz. Onsyz da politsiianyń kúndelikti sol qaýipsizdikti qamtamasyz etýi kerek emes pa.
Búgingi qalyptasqan epidaqýalǵa bailanysty, ákim provizordaǵy ár naýqaspen sóilesip, jaǵdailaryn bilip, aýdanǵa alynyp jatqan qurylǵylar men dári dármekter týraly habardar etip, naýqastarǵa qoldaý bildirýge kelgen saparyna sáttilik tileýimiz kerek, el qoldamasa, múmkindik bermese, tek qalai aiaǵynan shalamyz desek, onyń bolashaǵyna balta shabý, kerisinshe kishkene qoldaý bildirip, óziniń oilaryn iske asyrý ýshin, el bolyp qoldaiyq.
Men elge adal qyzmet etip júrmin dep oilaimyn, basshymyz da barlyǵynan osy adaldyqty talap etip otyr. Eldiń, basshynyń,prezidentimizdiń talabyna sáikes bolmasam, men osy laýazymdaǵy kresloma jabysyp otyrǵanym joq. Prezident aitqandai, óz basyńnyń emes, eldiń paidasyna sheshim qabyldaýǵa ár kez daiynmyn. Sondyqtan, aǵaiyn bolǵan nársege túsinistikpen qaraýlaryńyzdy, artyq aitqan bolsam, aldyn ala keshirim suraimyn», – dep koment qaldyrdy aýdan ákimi.
Oblys basshysy da málimdeme jasap joldy japtyrýǵa tapsyrma bermegenin aitty.
"Búgin men Jańaqorǵan, Shieli aýdandarynda aýrýhanalardy aralap júrdim. Onyń ishinde dári-dármekpen, ottegimen qamtamasyz etý máselesin tekserdim. Osy is-sapar kezinde Jańaqorǵan aýdanynyń infektsiialyq aýrýhanasynyń qasynda turǵan meniń mashinama Sandýǵash Turlybekova esimdi áiel kelip, joldyń jabylǵanyn aitty.
Bul yńǵaisyzdyq týdyrǵanyn aitty. Men joldy japtyrýǵa pármen bergen joqpyn. Aýdan ákimi de jol jabý týraly tapsyrma bergen joq.
Sol jerdegi Ishki ister bóliminiń basshysy da sói dep otyr. Eger bul sol jerdegi ýchaskelik politseidiń is-áreketi bolsa, buǵan qatysty oblystyq department basshysy Sultan Bektórege osy árekettiń durys-burystyǵyn anyqtaýǵa tapsyrma berdim. Qyzmettik tekserý júrgizedi", – dep málimdedi aimaq basshysy.
