Uly Abaıdyń 180 jyldyq mereıtoıyna arnalǵan halyqaralyq, respýblıkalyq jáne óńirlik deńgeıde 100-den astam aýqymdy is-sharany qamtıtyn keshendi jospar bekitildi. Búgin óńirlik komýnıkasıalar qyzmeti alańynda ótken baspasóz máslıhatynda Abaı oblysy mádenıet, tilderdi damytý jáne arhıv isi basqarmasynyń basshysy Janjigit Omarhan, Abaı aýdanynyń ákimi Meıirjan Smaǵulov, Semeı qalasy ákiminiń mindetin atqarýshy Bekjan Bapyshev mereıtoıǵa arnalǵan onkúndiktiń baǵdarlamasymen tanystyrdy.
– Aýqymdy baǵdarlama 1 tamyz kúni «ABAY ACADEMIYASY» ensıklopedıalyq portalynyń ashylýymen bastalady. Bul biregeı platforma aqyn murasyn sıfrlandyrý, júıeleý jáne ǵylymı ortaǵa qoljetimdi etýge baǵyttalǵan. Sol kúni Maqanshydaǵy Alakól jaǵasynda Qazaqstannyń halyq ártisi Seken Turysbekov pen «Aq jaýyn» orkestriniń konserti ótedi. Semeıdegi Arbat alańynda ıllústrator Ańsaǵan Mustafanyń kórmesi ashylyp, «Asyl mura» oblystyq qolóner festıvali uıymdastyrylady, – dep atap ótti basqarma basshysy.
Sonymen qatar, 2-6 tamyz aralyǵynda Qazaqstannyń halyq ártisi Maıra Ilásovanyń Abaıǵa arnalǵan gastróldik konserti Semeıden bastalyp, Úrjar, Aıagóz, Jarma jáne Jańasemeı aýdandarynda jalǵasady.
3 tamyzda Abaı teatrynda «Abaı álemi» rýhanı keshi ótse, 4 tamyzda Seken Turysbekov pen «Aq jaýyn» orkestriniń qorytyndy konserti usynylady.
5 tamyzda «Oı tolǵaý – Hákim Abaı» monooperasy sahnalanady jáne 6 tamyz kúni Abaı alańynda «Abaı eli – óner kenishi» konserti men Á.Bókeıhanov ýnıversıtetinde «Óleń sózdiń patshasy» atty jas aqyndar músháırasy ótpek.
– 7–9 tamyz kúnderi Abaı murasyn ǵylymı, ádebı jáne mádenı turǵyda keńinen nasıhattaýǵa baǵyttalǵan birqatar mazmundy is-sharalar ótedi. 7 tamyzda halyqaralyq «Alash» syılyǵynyń ıegeri Asqar Altaıdyń shyǵarmashylyq keshi aıasynda «Abaı joly» ensıklopedıasy men Baǵashar Tursynbaıulynyń «Abaı Qunanbaıuly kim?» kitabynyń tusaýkeseri bolady. 8 tamyzda Semeıde «Adamzattyń Abaıy» respýblıkalyq aqyndar aıtysy, Abaı aýdanynda «Jeti qazyna» ulttyq baıqaýynyń ashylýy ótse, 9 tamyzda Shákárim ýnıversıtetinde halyqaralyq ǵylymı konferensıa, «Jıdebaı-Bórili» mýzeıinde kórme, Abaı kitaphanasynda kitaptar toptamasynyń tusaýkeseri men 15 eldiń qatysýymen halyqaralyq aqyndar festıvali uıymdastyrylady. Keshkisin ortalyq alańda «Abaıǵa tartý» konserti ótedi, – dedi spıker.
10 tamyz – Abaı kúni. Bul kúni tańerteń Jıdebaıda Quran baǵyshtalyp, qurbandyq shalý rásiminen bastaý alady. Odan soń elimizdiń barlyq óńirinde Abaı eskertkishine gúl shoqtaryn qoıý rásimi uıymdastyrylmaq.
