Búgin Abai ýniversiteti Almatynyń irgesinde Agrobiostantsiia keshenin resmi túrde iske qosty. Ashylýyna ýniversitet basshylyǵy, professorlyq-oqytýshylar quramy jáne stýdentter qatysyp, zamanaýi agrobiostantsiianyń lentasy saltanatty túrde qiyldy. Bul jaratylystaný jáne geografiia fakýltetiniń bilim alýshylaryna zertteý jumystarymen ainalysyp, tájiribe jasaýǵa jasalǵan úlken múmkindik, dep habarlaidy Dalanews.kz.
Stýdenterdiń teoriialyq bilimin tájiribemen ushtastyrýǵa, ǵylymi zertteý jumystaryn júrgizýge arnalǵan Agrobiostantsiia Almaty oblysy Eńbekshiqazaq aýdany Jańashar aýylynda ornalasqan. 38 gektardan astam aýmaqty qamtityn keshen stýdentterge oqý-tájiribelik sabaqtaryn ótkizýge, ǵylymi jobalardy júzege asyrýǵa jáne jańa agrotehnologiialardy synaqtan ótkizýge múmkindik beredi. Zamanaýi oqý-zerthanalyq bazada zerthanalar, 60 adamǵa arnalǵan jataqhana, ashana, jýynatyn bólmeler, sport alańdary men kólik turaǵy qarastyrylǵan.
«Búgin – ýniversitetimiz úshin mańyzdy tarihi kún. Sebebi, bilim ordamyz taǵy da bir jańa nysanmen tolyqty. Bul – ýniversitetimizdiń zertteý joǵary oqý ornyna jasalǵan úlken qadam. Agrobiostantsiia – teoriia men tájiribeniń sintezi. Sondyqtan, mundai nysannyń ashylýy ýniversitetimizdegi ǵylymnyń damýyna septigin tigizedi. Bolashaqta bul jerde tájiribelik jumystar, ǵylymi zertteý jumystary qyzý júredi dep senemin», – dedi Abai atyndaǵy QazUPÝ Basqarma tóraǵasy-Rektory Bolat Tilep.
Jaratylystaný jáne geografiia fakýltetinde oqityn stýdentter agrobiostantsiiada tájiribelik sabaqtarmen ainalysyp, magistranttar men doktoranttar ǵylymi zertteýlerin júrgizedi. Jobalar topyraq pen sý resýrstaryn tiimdi paidalaný, aýyl sharýashylyǵy daqyldaryn zertteý, biologiia, ekologiia, geografiia sekildi oqý baǵdarlamalary boiynsha jańa tehnologiialardy synaý t.b. baǵyttar boiynsha ótkiziledi.
«Búgin Jaratylystaný jáne geografiia fakýlteti úshin eń qýanyshty kún. Bilim alýshylar úshin teoriia men tájiribeni úilestirip, bilimin tereńdetip, ǵylymǵa qyzýǵyshylyǵyn arttyratyn baza paida boldy. Infraqurylymdyq úlken bazada stýdentter men jetekshilerdiń ǵylymmen ainalysýyna qolaily jaǵdai jasalǵan. Agrobiostantsiianyń jumysyn jandandyryp, ǵylymi-ádistemelik ortalyqqa ainaldyrý bizdiń ujym men stýdentterdiń qolynda dep oilaimyn», – dedi Jaratylystaný jáne geografiia fakýltetiniń dekany Kúlásh Kaimýldinova.
Keshen tabiǵi-geografiialyq turǵydan qolaily aimaqta ornalasqan. Gidrogeologiialyq zertteýler nátijesinde sý uńǵymalary qazylyp, egistik alqaptaryn sýarýǵa múmkindik jasalǵan. Abai ýniversitetiniń Agrobiostantsiiasy oqý-tájiribe bazasy retinde qyzmet etedi jáne stýdentterdiń kásibi daiyndyǵyn qoldaýǵa baǵyttalǵan.
Sonymen qatar, tusaýkeser rásiminde «Taza Qazaqstan» aktsiiasynyń aiasynda kógaldandyrý men ekologiialyq tabiǵi resýrstardy baiytý maqsatynda «Ile Alataý» ulttyq parki 100 túp aǵash kóshetin syiǵa tartty. Agrobiostantsiianyń ashylýynda ýniversitet basshylyǵy men oqytýshy-professorlar jáne stýdentter aýmaqqa jas ósikderdi otyrǵyzyp, keshen múmkindigimen jan-jaqty tanysty.
