Abai toiynda Máýlen Áshimbaev bastaǵan shendilerdiń eriktilerdiń qorshaýynda júrgenin áleýmettik jelige tarap, synǵa qalǵan edi. Osy máselege bailanysty QR Parlamenti Senatynyń baspasóz qyzmeti jetekshisi Daniiar Ramazanov jeke paraqshasynda pikir bildirdi.
– Sońǵy kúnderde áleýmettik jelilerde Abai toiyna barǵan Senat Tóraǵasy, Abai oblysynyń ákimi, ministrler jáne saltanatty is-sharaǵa kelgen basqa da delegattardyń «qaýipsizdik sheńberimen» qorshalyp júrgeni týraly aqparat taraǵany belgili.
Osy máselege bailanysty Abai oblysynyń ákimdigi, ákim Berik Ýáli, sondai-aq, keshe ministr Saiasat Nurbek túsinikteme berdi. Rasymen, mundai árekettiń múldem orynsyz ekenine eshqandai kúmán joq. Biz atalǵan jaitty kórgen boida eriktilerden ony doǵaryp, basqa, mańyzdy istermen ainalysýyn suradyq. Osylaisha, bul jaǵdai óte qysqa ýaqytqa ǵana jalǵasty.
Al, qalǵan ýaqytta biz kiiz úiler qalashyǵynda erkin júrip-turdyq. Merekege kelgen kez kelgen adam Senat Tóraǵasymen kezdesip, amandasyp, pikirleskenin osy videodan-aq anyq kórýge bolady. Uzaq túsindirip jatqannan góri, bir ret kórsetip, máseleni osy jerden japqan durys dep oilaimyn.
Ókinishke qarai, keibir jeli qoldanýshylary on kún boiy atalyp ótken dúbirli toidy jalǵyz osy keleńsizdikpen bailanystyryp, «jerden jeti qoian tapqandai» jarysa jazyp jatyr. Al, biz oishyl ósiet etkendei, qalpymyz ben sanamyzdy taza ustasaq, jarqyn sátterge kóbirek mán bersek, osy bir ulaǵatty isten ónege alsaq deimiz.
Jalpy, baspasóz hatshysy retinde, basqa-basqa, dál Senat Tóraǵasynyń halyqpen suhbat qurýǵa, qoiylǵan suraqtarǵa jaýap berýge, aitylǵan pikirdi tyńdaýǵa árdaiym ashyq ekenin atap ótkim keledi. Bul rette ol eshqashan eshkimnen jaltaryp kórgen emes. Ony Máýlen Saǵathanulymen apta saiyn kezdesip, saýaldaryna jaýap alyp jýrnalister qaýymy jaqsy biledi.
