Ǵylym festıváline elimizdiń barlyq aımaǵynan 85 komanda qatysyp, óz jobalaryn usynǵan-dy. Al irikteý kezeńinde 20 komanda Astana qalasynda baq synady. Elimiz boıynsha bes komanda jeńimpaz atandy.
Ekologıa máselesine arnalǵan ǵylymı festıválǵa Abaı oblysynan Aıagóz aýdanyndaǵy Keshirim Boztaev atyndaǵy qazaq mektep-gımnazıasynyń 8-synyp oqýshylary Jarkenaev Ersultan, Qurmanǵojın Dáýlet, Beısen Merýert qatysyp, 1 000 000 teńge grant ıegeri atandy.
Abaı oblysy namysyn qorǵaǵan «Transformers» toby qar jáne jańbyr sýlaryn tazartyp, paıdalaný máselesine qatysty jobany qorǵaǵan.
Jobanyń kózdegen maqsaty – mektep aýlasynda sý rezervýarlaryn qoldanyp, mektepti aýyz sý jáne sharýashylyq qyzmetke arnalǵan sýmen qamtamasyz etý. Oqýshylar mekteptiń 3D modelin jáne qar kúreıtin robot úlgisin usyndy.
Aıta keteıik, festıválǵa elimiz boıynsha 8-11 synyp oqýshylary qatysty. Jobalar saıysynda sý tapshylyǵy, balama energıany qoldaný, mektep aýlasyn kógaldandyrý, kún energıasyn qoldaný, qaǵaz qaldyqtaryn óńdeý, kókónister ósiretin jylyjaı, qala ishindegi saıabaqtyń sý qoımasyn baldyrlardan tazartý máseleleri boıynsha jumystar qorǵaldy.
