عىلىم فەستيۆالىنە ەلىمىزدىڭ بارلىق ايماعىنان 85 كوماندا قاتىسىپ، ءوز جوبالارىن ۇسىنعان-دى. ال ىرىكتەۋ كەزەڭىندە 20 كوماندا استانا قالاسىندا ب ا ق سىنادى. ەلىمىز بويىنشا بەس كوماندا جەڭىمپاز اتاندى.
ەكولوگيا ماسەلەسىنە ارنالعان عىلىمي فەستيۆالعا اباي وبلىسىنان اياگوز اۋدانىنداعى كەشىرىم بوزتايەۆ اتىنداعى قازاق مەكتەپ-گيمنازياسىنىڭ 8-سىنىپ وقۋشىلارى جاركەنايەۆ ەرسۇلتان، قۇرمانعوجين داۋلەت، بەيسەن مەرۋەرت قاتىسىپ، 1 000 000 تەڭگە گرانت يەگەرى اتاندى.
اباي وبلىسى نامىسىن قورعاعان «Transformers» توبى قار جانە جاڭبىر سۋلارىن تازارتىپ، پايدالانۋ ماسەلەسىنە قاتىستى جوبانى قورعاعان.
جوبانىڭ كوزدەگەن ماقساتى – مەكتەپ اۋلاسىندا سۋ رەزەرۆۋارلارىن قولدانىپ، مەكتەپتى اۋىز سۋ جانە شارۋاشىلىق قىزمەتكە ارنالعان سۋمەن قامتاماسىز ەتۋ. وقۋشىلار مەكتەپتىڭ 3D مودەلىن جانە قار كۇرەيتىن روبوت ۇلگىسىن ۇسىندى.
ايتا كەتەيىك، فەستيۆالعا ەلىمىز بويىنشا 8-11 سىنىپ وقۋشىلارى قاتىستى. جوبالار سايىسىندا سۋ تاپشىلىعى، بالاما ەنەرگيانى قولدانۋ، مەكتەپ اۋلاسىن كوگالداندىرۋ، كۇن ەنەرگياسىن قولدانۋ، قاعاز قالدىقتارىن وڭدەۋ، كوكونىستەر وسىرەتىن جىلىجاي، قالا ىشىندەگى ساياباقتىڭ سۋ قويماسىن بالدىرلاردان تازارتۋ ماسەلەلەرى بويىنشا جۇمىستار قورعالدى.
