Aiagóz aýdanyndaǵy kópbeiindi qazaq mektep-gimnaziiasynyń 8-synyp oqýshylary Ilias Zakirov pen Dias Dastanov qarapaiym zattardan tiimdi sý súzgisin jasap shyǵardy, dep habarlaidy Dalanews.kz
Bul qurylǵyny sý tasqyny, jer silkinisi nemese aýyzsý júiesi isten shyqqan jaǵdaida shuǵyl kómek quraly retinde paidalanýǵa bolady.
Jas ónertapqyshtar kóktemgi erigen qar men jaýyn sýlarynyń bosqa ketetinin baiqap, olardy súzgiden ótkizý arqyly ýaqytsha aýyzsý kózine ainaldyrýdy usyndy. Súzgi turmysta da, qurylys alańynda da, tótenshe jaǵdailarda da qoldanýǵa yńǵaily.
Qurylǵy bótelke, qum, usaq jáne iri tas, belsendirilgen kómir men maqta sekildi qoljetimdi zattardan turady. Ár qabatynyń óz qyzmeti bar: tastar – laidan, kómir – iisten, qum – bakteriialardan tazartady. Al maqta – sońǵy usaq qaldyqtardy súzip ótkizedi. Balalar súzgi arqyly sýdy 48 paiyzǵa deiin únemdeýge bolatynyn eseptep shyqqan.
Jobanyń jetekshisi – Qantjan Bastosova. Onyń aitýynsha, Ilias pen Dias ekologiia men IT baǵyttaryn biriktirip, bolashaqta osyndai qoldanbaly qurylǵylardy jetildirýdi kózdep otyr.
«Biz bul súzgini kez kelgen adam tótenshe jaǵdaida óz betinshe qoldana alatyndai etip jasadyq. Qarapaiym zattardan paidaly dúnie qurastyrýǵa bolatynyn dáleldegimiz keldi», – deidi oqýshylar.
Qurylǵy aimaqtyq robototehnika chempionatynda úzdik ondyqqa endi. Qazir oqýshylar súzgini IT tehnologiialarmen úilestirip, naqty ónimge ainaldyrýǵa kúsh salýda.
