Abaı oblysynyń óńirlik komýnıkasıadar qyzmeti alańynda «Aýa-tamshy joldary arqyly taralatyn aýrýlar (JRVI, tumaý, KVI, qyzylsha, kókjótel) boıynsha epıdemıologıalyq jaǵdaı» taqyrybynda baspasóz maslıhaty ótti. Bul týraly Abaı oblysynyń sanıtarıalyq-epıdemıologıalyq baqylaý Departamentiniń basshysy Nurjan Noǵaıbaev baıandady, – dep habarlaıdy Dalanews.kz.
– Búginde oblys aýmaǵynda vırýsty juqpalar, atap aıtqanda JRVI, tumaý, KVI, qyzylsha jáne kókjótel boıynsha epıdemıologıalyq jaǵdaı turaqty. JRVI jáne tumaý aýrýlary boıynsha byltyrǵy jáne bıylǵy jyldy qosqanda barlyǵy 38305 jaǵdaı tirkelgen. Onyń 21895 jaǵdaıy 14 jasqa deıingi balalar arasynda, ıaǵnı syrqattanýshylyqtyń 57,1% quraıdy. Bıyl ótken epıdmaýsymmen salystyrǵanda syrqattanýshylyq 4,1 % artqan, – dedi spıker.
Abaı oblysynda 2024 jyly KVI jaǵdaılary tirkelmegen.
– Byltyrǵy jyldyń qorytyndysy boıynsha oblysta qyzylshanyń rastalǵan 217 jaǵdaıy qarastyrylǵan. Aǵymdaǵy jylmen salystyrǵanda 225 zerthanalyq rastalǵan jaǵdaıǵa kóbeıgen. 2023 jyldyń 6 qarashasynan beri qosymsha jappaı ımmýndaý júrgizilýde. Barlyq ımmýndaýǵa jatatyn 40000 adamnyń 89,6% egildi, – dep atap ótti departament basshysy.
Spıkerdiń aıtýynsha, jyl basynan beri kókjótelge kúdikti 13 jaǵdaı tirkelgen. Onyń ishinde 2 jaǵdaı IFA ádisimen rastalyp, 4 jaǵdaı alynyp tastalǵan jáne 7 jaǵdaı laboratorıalyq jumys ústinde.
– Vırýstan saqtanýdyń birneshe sharalary qarastyrlǵan. Olardyń eń tıimdisi – vaksınasıa. Eger profılaktıkalyq ekpelerdi ótkizip alǵan bolsańyzdar, esesin toltyrýshy ekpe júrgizý aıasynda, qyzylsha men kókjótel ǵana emes, basqa da barlyq ekpelerdi tolyqtaı alýǵa bolady jáne júrgizilip jatqan qosymsha jappaı ımmýndaý aıasynda qyzylshaǵa qarsy ekpeni balalar men jasóspirimderge de alýǵa shaqyramyz.
Sonymen qatar, áýejaılar, temirjol vokzaldary, bazarlar, saýda-oıyn-saýyq ortalyqtary, saýda úıleri, teatrlar, kınoteatrlar, HQKO, bankter sıaqty qoǵamdyq oryndarǵa qatysty jáne de maskalardy qoǵamdyq kóliktiń barlyq túrlerinde qoldanýdy usynamyz, – dep qorytyndylady Nurjan Noǵaıbaev.
