Abai oblys ákimdigi janyndaǵy sybailas jemqorlyqqa qarsy is-qimyl jónindegi vedomstvoaralyq komissiianyń kezekti otyrysy ótti. Aimaq basshysy Berik Ýálidiń tóraǵalyǵymen ótken jiynda týrizm salasyndaǵy sybailas jemqorlyq táýekelderin syrtqy taldaý nátijeleri jáne oblystyń kvazimemlekettik sektoryndaǵy komplaens qyzmetterdiń jái-kúii talqylandy,– dep habarlaidy Dalanews.kz
Qazirgi tańda Abai oblysynda óńir turǵyndary men qonaqtary arasynda úlken suranysqa ie 3 týristik nysan bar.
Olar - Alakól jaǵalaýy, Abaidyń «Jidebai-Bórili» mýzei-qoryǵy jáne Abai aýdanyndaǵy Qońyr áýlie úńgiri.
Otyrysta tarihi eskertkishter ornalasqan jerlerde kásipkerlik qyzmetpen zańsyz ainalysý faktilerin joiý boiynsha usynystar aityldy.
Maqanshy aýdanynyń ákimi Dáýren Qoigeldin beinerejim arqyly Alakól aýmaǵynda jeke menshikke zańsyz berilgen jerlerdi qaitarý boiynsha júrgizilip jatqan jumys jaiynda baiandady. Úrjar aýdanynyń ákimi Aqylbek Bashimbaev Alakól kýrorttyq aimaǵyn sýmen jabdyqtaý sharalary týraly aitty.
Aimaq basshysy otyrys qorytyndysy boiynsha Kásipkerlik basqarmasyna múddeli memlekettik organdarmen birlese otyryp týristik aimaqtardyń infraqurylymyna taldaý júrgizýdi jáne keshendi jospar ázirleýdi tapsyrdy. Mádeniet basqarmasyna "Jidebai-Bórili" mýzei-qoryǵy men Qońyr áýlie úńgiri týristik nysandary boiynsha aitylǵan eskertýlerdi nazarǵa alýdy júktedi. Oblys ákiminiń apparatyna Jobalaý keńsesiniń jumysy men kvazimemlekettik sektordaǵy komplaens qyzmetti jetildirý boiynsha sharalar qabyldaýdy mindettedi.
"Zańsyz berilgen jerler boiynsha quqyq qorǵaý organdarymen birlese jumys isteý kerek. Aýyldardy aýyz sýmen qamtamasyz etý - Memleket basshysynyń nazaryndaǵy másele. Bul baǵyttaǵy jumystardy jyl sońyna deiin aiaqtaýymyz qajet", - dedi aimaq basshysy.
