Semeide Premer-Ministrdiń keńesshisi Eraly Toǵjanovtyń tóraǵalyǵymen «Aýyl amanaty» baǵdarlamasy boiynsha keńes ótti,- dep habarlaidy Dalanews.kz
Jiynǵa Abai oblysynyń ákimi Berik Ýáli, óńirdiń qala-aýdandarynyń ákimderi, tiisti basqarma basshylary, sharýa qojalyǵynyń jetekshileri qatysty. Aýyl ákimderi otyrysty beine rejimde kórdi.
Keńeste oblystyq Aýyl sharýashylyǵy basqarmasynyń basshysy Ertai Qýanbaev «Aýyl amanaty» baǵdarlamasynyń óńirde iske asyrylý barysy týraly baiandady. 2023 jyly baǵdarlama aiasynda 2 milliard teńgeden astam qarjy bólinip, 365 jeńildetilgen shaǵyn nesie berilgen. 280 jumys orny qurylyp, 210 jeke kásipker tirkeldi. Nátijesinde 340 tonna et, 10 tonna bal óndirilgen. Baǵdarlamanyń kómegimen ashylǵan naýbaihanalarda 216 myń bólke nan shyǵarylǵan.
Biyl oblys 1 mlrd. teńge somasyna 115 joba ázirledi. Onyń ishinde 55 joba dástúrli emes biznes kózderin ashýǵa (jihaz jasaý tsehyn ashý, konditerlik tsehqa qural jabdyqtar satyp alý, tehnikalyq qyzmet kórsetý stantsiiasyn ashý, naýbaihana ashý), 29 joba aýyl sharýashylyǵy ónimderin qaita óńdeýge, 7 joba balyq sharýashylyǵyn damytýǵa baǵyttalmaq.
Premer-Ministrdiń keńesshisi baǵdarlamany júzege asyrý barysynda mal sharýashylyǵyna ǵana kóńil bólmei, dástúrli emes sharýashylyqtardy damytý keregin atap ótti.
«Aýyl amanaty» - Prezidenttiń bastamasymen júzege asyrylyp jatqan, aýyl halqyn qoldaýǵa, ál-aýqatyn arttyrýǵa baǵyttalǵan arnaiy baǵdarlama. Ókinishke qarai, sońǵy jyldary aýyldan qalaǵa kóshý toqtamai tur. Osyny toqtatý úshin baǵdarlamany jandandyrý kerek. Halyq tutynatyn negizgi azyq-túlik taýarlarynyń 65 túri bar. Abai oblysynda sonyń 17 túri damyǵan eken. Sondyqtan qalǵan túrlerin óńirde damytý boiynsha jumys isteý kerek. Ásirese, aýyl ákimderi. Ákimderdiń mindeti – aýyl azamattaryn jumyspen qamtý. Úkimet tarapynan tiisti qoldaý bildiretin bolamyz»,- dedi Eraly Toǵjanov.
Keńes barysynda Aqtóbe oblysy Mártók aýdanynyń Táńirbergen aýyldyq okrýginiń ákimi óz tájiribesimen bólisti. Bul eldi mekende «Aýyl amanaty» baǵdarlamasymen 60-qa jýyq joba sátti júzege asqan. Qus sharýashylyǵy boiynsha nesiege qol jetkizgen aýyl turǵyny 300 taýyq pen qaz satyp alyp, jeke qosalqy sharýashylyq ashqan. Aýylda jumyssyzdyq joiylǵan.
Taýarlyq nesie jobasy
Jiynda Abai oblysynda taýarlyq nesie jobasyn júzege asyrý bastamasy da talqylandy. Jobanyń maqsaty – aýyldaǵy jaǵdaiy tómen turǵyndarǵa qaitarymdy negizge mal berý arqyly olardyń ál-aýqatyn jaqsartý. Oblys kásipkerleri jobany qoldaýǵa daiyn ekenin jetkizdi. «Agrofirma Prirechnoe», «Órnek», «Qaliqanuly» sharýa qojalyǵynyń jetekshileri Muhit Tumabaev, Erjan Qoigeldin, Marat Qaliqanuly, «Kezeńsý» AÓK direktory Nurtýǵan Manap, «Qazaq-onimi» JShS direktory Dastan Yqybaev jáne «Ońdasyn Saiabek» JK jetekshisi Saiabek Ońdasynuly sekildi kásipkerler bastamaǵa birinshi bolyp qoldaý bildirip, 2100 bas siyr, jylqy, qoi men eshkini turǵyndarǵa beretinin aitty.
«Óte oryndy bastama. Aýyldy saqtap qalýǵa septigin tigizetin igi bastama. Aýylǵa kóship kelemin, jumys isteimin degen azamattar bolsa kómektesýge daiynbyz. Siyrdy da, qoidy da berýge ázirmiz. Bizdiń Kókpekti aýdanynda kókónis ósirip, omarta sharýashylyǵymen de ainalysýǵa bolady»,- dedi «Órnek» sharýa qojalyǵynyń basshysy Erjan Qoigeldin.
Keńesti qorytyndylaǵan oblys ákimi «Aýyl amanaty» baǵdarlamasyn jandandyrýdy, óńirdiń aýyl ákimderine Mártók aýdanynyń tájiribesin negizge alyp, osy baǵyttaǵy jumysty kúsheitýdi tapsyrdy.
«Abai oblysynyń áleýeti zor. Keńes zamany kezinde mal sharýashylyǵymen, aýyl sharýashylyǵymen dańqy shyqqan aimaq. Sol áleýetti qaita qalpyna keltirýimiz kerek. Bastalǵan jobalarǵa oblys ákimdigi tarapynan barlyq jaǵynan qoldaý bildiremiz. Taýarlyq nesie jobasy boiynsha aýyl ákimdigi, kásipkerler men turǵyndar arasynda úsh jaqty kelisim jasaýymyz qajet. Kepildeme máselesin aiqyndap, taraptar jaýapkershilikti birlesip alýymyz kerek»,- dedi aimaq basshysy.
Premer-Ministrdiń keńesshisi jiynnan keiin Semeidegi ósimdik maiyn óndiretin “Qazaq-Astyq Group” kompaniiasy men «Baqyrshyq» ken óndirý kásipornynyń jumysymen tanysty.
