سەمەيدە پرەمەر-مينيستردىڭ كەڭەسشىسى ەرالى توعجانوۆتىڭ توراعالىعىمەن «اۋىل اماناتى» باعدارلاماسى بويىنشا كەڭەس ءوتتى،- دەپ حابارلايدى Dalanews.kz
جيىنعا اباي وبلىسىنىڭ اكىمى بەرىك ءۋالي، ءوڭىردىڭ قالا-اۋداندارىنىڭ اكىمدەرى، ءتيىستى باسقارما باسشىلارى، شارۋا قوجالىعىنىڭ جەتەكشىلەرى قاتىستى. اۋىل اكىمدەرى وتىرىستى بەينە رەجيمدە كوردى.
كەڭەستە وبلىستىق اۋىل شارۋاشىلىعى باسقارماسىنىڭ باسشىسى ەرتاي قۋانبايەۆ «اۋىل اماناتى» باعدارلاماسىنىڭ وڭىردە ىسكە اسىرىلۋ بارىسى تۋرالى باياندادى. 2023 جىلى باعدارلاما اياسىندا 2 ميلليارد تەڭگەدەن استام قارجى ءبولىنىپ، 365 جەڭىلدەتىلگەن شاعىن نەسيە بەرىلگەن. 280 جۇمىس ورنى قۇرىلىپ، 210 جەكە كاسىپكەر تىركەلدى. ناتيجەسىندە 340 توننا ەت، 10 توننا بال وندىرىلگەن. باعدارلامانىڭ كومەگىمەن اشىلعان ناۋبايحانالاردا 216 مىڭ بولكە نان شىعارىلعان.
بيىل وبلىس 1 ملرد. تەڭگە سوماسىنا 115 جوبا ازىرلەدى. ونىڭ ىشىندە 55 جوبا ءداستۇرلى ەمەس بيزنەس كوزدەرىن اشۋعا (جيھاز جاساۋ سەحىن اشۋ، كونديتەرلىك سەحقا قۇرال جابدىقتار ساتىپ الۋ، تەحنيكالىق قىزمەت كورسەتۋ ستانسياسىن اشۋ، ناۋبايحانا اشۋ)، 29 جوبا اۋىل شارۋاشىلىعى ونىمدەرىن قايتا وڭدەۋگە، 7 جوبا بالىق شارۋاشىلىعىن دامىتۋعا باعىتتالماق.
پرەمەر-مينيستردىڭ كەڭەسشىسى باعدارلامانى جۇزەگە اسىرۋ بارىسىندا مال شارۋاشىلىعىنا عانا كوڭىل بولمەي، ءداستۇرلى ەمەس شارۋاشىلىقتاردى دامىتۋ كەرەگىن اتاپ ءوتتى.
«اۋىل اماناتى» - پرەزيدەنتتىڭ باستاماسىمەن جۇزەگە اسىرىلىپ جاتقان، اۋىل حالقىن قولداۋعا، ءال-اۋقاتىن ارتتىرۋعا باعىتتالعان ارنايى باعدارلاما. وكىنىشكە قاراي، سوڭعى جىلدارى اۋىلدان قالاعا كوشۋ توقتاماي تۇر. وسىنى توقتاتۋ ءۇشىن باعدارلامانى جانداندىرۋ كەرەك. حالىق تۇتىناتىن نەگىزگى ازىق-تۇلىك تاۋارلارىنىڭ 65 ءتۇرى بار. اباي وبلىسىندا سونىڭ 17 ءتۇرى دامىعان ەكەن. سوندىقتان قالعان تۇرلەرىن وڭىردە دامىتۋ بويىنشا جۇمىس ىستەۋ كەرەك. اسىرەسە، اۋىل اكىمدەرى. اكىمدەردىڭ مىندەتى – اۋىل ازاماتتارىن جۇمىسپەن قامتۋ. ۇكىمەت تاراپىنان ءتيىستى قولداۋ بىلدىرەتىن بولامىز»،- دەدى ەرالى توعجانوۆ.
كەڭەس بارىسىندا اقتوبە وبلىسى مارتوك اۋدانىنىڭ تاڭىربەرگەن اۋىلدىق وكرۋگىنىڭ اكىمى ءوز تاجىريبەسىمەن ءبولىستى. بۇل ەلدى مەكەندە «اۋىل اماناتى» باعدارلاماسىمەن 60-قا جۋىق جوبا ءساتتى جۇزەگە اسقان. قۇس شارۋاشىلىعى بويىنشا نەسيەگە قول جەتكىزگەن اۋىل تۇرعىنى 300 تاۋىق پەن قاز ساتىپ الىپ، جەكە قوسالقى شارۋاشىلىق اشقان. اۋىلدا جۇمىسسىزدىق جويىلعان.
تاۋارلىق نەسيە جوباسى
جيىندا اباي وبلىسىندا تاۋارلىق نەسيە جوباسىن جۇزەگە اسىرۋ باستاماسى دا تالقىلاندى. جوبانىڭ ماقساتى – اۋىلداعى جاعدايى تومەن تۇرعىندارعا قايتارىمدى نەگىزگە مال بەرۋ ارقىلى ولاردىڭ ءال-اۋقاتىن جاقسارتۋ. وبلىس كاسىپكەرلەرى جوبانى قولداۋعا دايىن ەكەنىن جەتكىزدى. «اگروفيرما پريرەچنوە»، «ورنەك»، «قاليقان ۇلى» شارۋا قوجالىعىنىڭ جەتەكشىلەرى مۇحيت تۇمابايەۆ، ەرجان قويگەلدين، مارات قاليقان ۇلى، «كەزەڭسۋ» اوك ديرەكتورى نۇرتۋعان ماناپ، «Qazaq-onimi» ج ش س ديرەكتورى داستان ىقىبايەۆ جانە «وڭداسىن سايابەك» جك جەتەكشىسى سايابەك وڭداسىن ۇلى سەكىلدى كاسىپكەرلەر باستاماعا ءبىرىنشى بولىپ قولداۋ ءبىلدىرىپ، 2100 باس سيىر، جىلقى، قوي مەن ەشكىنى تۇرعىندارعا بەرەتىنىن ايتتى.
«وتە ورىندى باستاما. اۋىلدى ساقتاپ قالۋعا سەپتىگىن تيگىزەتىن يگى باستاما. اۋىلعا كوشىپ كەلەمىن، جۇمىس ىستەيمىن دەگەن ازاماتتار بولسا كومەكتەسۋگە دايىنبىز. سيىردى دا، قويدى دا بەرۋگە ءازىرمىز. ءبىزدىڭ كوكپەكتى اۋدانىندا كوكونىس ءوسىرىپ، ومارتا شارۋاشىلىعىمەن دە اينالىسۋعا بولادى»،- دەدى «ورنەك» شارۋا قوجالىعىنىڭ باسشىسى ەرجان قويگەلدين.
كەڭەستى قورىتىندىلاعان وبلىس اكىمى «اۋىل اماناتى» باعدارلاماسىن جانداندىرۋدى، ءوڭىردىڭ اۋىل اكىمدەرىنە مارتوك اۋدانىنىڭ تاجىريبەسىن نەگىزگە الىپ، وسى باعىتتاعى جۇمىستى كۇشەيتۋدى تاپسىردى.
«اباي وبلىسىنىڭ الەۋەتى زور. كەڭەس زامانى كەزىندە مال شارۋاشىلىعىمەن، اۋىل شارۋاشىلىعىمەن داڭقى شىققان ايماق. سول الەۋەتتى قايتا قالپىنا كەلتىرۋىمىز كەرەك. باستالعان جوبالارعا وبلىس اكىمدىگى تاراپىنان بارلىق جاعىنان قولداۋ بىلدىرەمىز. تاۋارلىق نەسيە جوباسى بويىنشا اۋىل اكىمدىگى، كاسىپكەرلەر مەن تۇرعىندار اراسىندا ءۇش جاقتى كەلىسىم جاساۋىمىز قاجەت. كەپىلدەمە ماسەلەسىن ايقىنداپ، تاراپتار جاۋاپكەرشىلىكتى بىرلەسىپ الۋىمىز كەرەك»،- دەدى ايماق باسشىسى.
پرەمەر-مينيستردىڭ كەڭەسشىسى جيىننان كەيىن سەمەيدەگى وسىمدىك مايىن وندىرەتىن “Qazaq-Astyq Group” كومپانياسى مەن «باقىرشىق» كەن ءوندىرۋ كاسىپورنىنىڭ جۇمىسىمەن تانىستى.
