Búgin oblys ákimi Berik Ýáli Semeidegi «Es-Aimaq» rýhani ortalyǵynda jergilikti biýdjet esebinen bólingen bilim berý grantynyń iegerlerimen kezdesti. Kezdesýge óńirdegi joǵary oqý oryndarynyń rektorlary, kolledj, mektep direktorlary, basqarma basshylary, stýdentter qatysty, dep habarlaidy Dalanews.kz.
Biyl oblys ákimdigi joǵary oqý ornynda bilim alýǵa eń qajetti, suranysqa ie 32 mamandyq boiynsha 200 grant qarastyrdy. Pedagogika, ekonomika, tehnika, qurylys, meditsina, aýyl sharýashylyǵy jáne IT salasy mamandaryn daiarlaýǵa baǵyttaldy.
Bilim granttaryn bólý baǵdarlamasy alǵash ret 2023 jyly qolǵa alyndy. Biyl tuńǵysh ret «Jýrnalistika» jáne «Stomatologiia» mamandyqtaryna da grant qarastyrylyp, jańa kadrlardy daiarlaýǵa jol ashyldy.
Erekshe atap óterligi, respýblika boiynsha bizdiń oblys 200 grantpen aldyńǵy altynshy orynǵa shyqty.
Aimaq basshysy grant iegerlerin quttyqtap, jastardyń alǵan bilimin týǵan eldiń damýyna arnaýy qajettigin atap ótti.
«Prezidentimiz «Bilim men ǵylym – tabysqa jetýdiń eń basty kilti. Óskeleń urpaqqa taǵylymdy tárbie jáne ozyq bilim berý – óte mańyzdy mindet», – dep atap ótken bolatyn. Ózderińiz jaqsy bilesizder, aýdandar men shalǵai eldi-mekenderge jii issaparmen baryp turamyn. Sol óńirlerdi aralaǵan kezde eń ózekti másele kadr tapshylyǵyna kýá bolyp júrmin.
Qujat tapsyrǵan mektep túlekteriniń jalpy sany 500-den asty. Alaida biz oqý úlgerimi jaqsy, balldary joǵary, pándik olimpiadalar men sport jarystarynyń júldegerleri bolǵan, sonymen qatar az qamtylǵan jáne kópbalaly otbasylardyń, aýyl mektepteriniń túlekterine basymdyq bere otyryp, qajet mamandyqtarǵa grant bóldik. Al birqatar oblystarda mundai grant qarastyrylmaǵan. Bul degenimiz – jańa qurylǵan óńir úshin úlken jetistik ári jastarǵa jasalǵan zor qamqorlyq.
Biyl ákim granttarynyń ádil bólinýin ózim tikelei qadaǵaladym. Sebebi Ádiletti qoǵam quryp, adal azamat tárbieleý eń qadirli de qasietti sala bilim men ǵylymnan bastaý alýy kerek dep esepteimin.
Qurmetti jastar! Abai oblysynyń bolashaǵy – sizderdiń qoldaryńyzda. Búgingi jeńis – úlken joldyń bastaýy. Aldaǵy ýaqytta elge adal qyzmet etip, óńirimizdiń damýyna úles qosasyzdar dep senemin», – dedi oblys ákimi.
Kezdesýde oblys ákiminiń grantyna ie bolǵan stýdentter kórsetilgen qoldaý úshin óz rizashylyqtaryn jetkizdi.
«Jastarǵa kórsetilip otyrǵan qoldaý – bizdiń bilimimizdi tereńdetip, alǵa qoiǵan maqsattarymyzǵa jetýimizge úlken serpin beredi. Aldaǵy ýaqytta alǵan bilimimizdi el igiligine jumsap, senimdi aqtaýǵa bar kúshimizdi salamyz», – dedi Semei meditsina ýniversitetiniń «Stomatologiia» mamandyǵynyń stýdenti Jibek Temirjanova.
Kezdesýde sondai-aq Abai oblysy pedagogikalyq eńbek ardagerleri keńesiniń tóraǵasy Mádeniet Ahmetova, Alikhan Bokeikhan University tárbie jumysy jáne áleýmettik máseleler jónindegi prorektory Airat Bazenov sóz alyp, ákim granty jastarǵa úlken qoldaý, zor múmkindik ekenin atap ótti.
Qazirgi tańda óńirdegi úsh iri joǵary oqý ornynda – Shákárim ýniversiteti, Alikhan Bokeikhan University jáne Semei meditsina ýniversitetinde 20 myńǵa jýyq stýdent oqyp jatyr.
