Abai oblysynda 2025 jyldyń basynan beri balalardyń terezeden qulaýyna bailanysty úsh jaǵdai tirkeldi. Bul týraly óńirlik kommýnikatsiialar qyzmetiniń alańynda ótken baspasóz máslihatynda oblystyq Politsiia departamenti Jergilikti politsiia qyzmeti basqarmasy bastyǵynyń orynbasary, politsiia podpolkovnigi Baýyrjan Sadaqbaev málimdedi, – dep habarlaidy Dalanews.kz
– Eki bala 5-qabattan, bir bala balkonnan qulap, jaraqat aldy. Abyroi bolǵanda, bári aman qaldy, biraq bastarynan jaraqat alyp, emhanaǵa jetkizildi. Eki ata-ana Ákimshilik quqyqbuzýshylyq týraly kodekstiń 127-baby boiynsha jaýapkershilikke tartyldy, – dedi tártip saqshysy.
Jazataiym oqiǵalardyń aldyn alý maqsatynda politsiia qyzmetkerleri Tótenshe jaǵdailar departamentimen birlesip, bilim berý uiymdary men eldi mekenderde profilaktikalyq is-sharalar ótkizip keledi. Jyl basynan beri 300-ge jýyq dáris pen 75 kezdesý uiymdastyrylǵan.
Abai oblysy Tótenshe jaǵdailar departamenti bastyǵynyń orynbasary, azamattyq qorǵaý polkovnigi Aleksei Shtykeldiń málimetinshe, 2022 jyldan beri óńirde balalardyń terezeden qulaýyna bailanysty 32 jaǵdai tirkelgen, onyń úsheýi — biyl.
– Mundai oqiǵalar kóbine ata-analardyń salǵyrttyǵy men balalardy qaraýsyz qaldyrý saldarynan bolady. Sondai-aq tereze mańyna jihazdyń durys ornalastyrylmaýy da sebep. Bul faktiler Qylmystyq kodekstiń 119-baby boiynsha jaýapkershilikke negiz bola alady, – dedi ol.
Spikerdiń aitýynsha, biyldyń ózinde 1 500-den astam adamdy qamtyǵan túsindirý jumystary júrgizilgen. Tereze qaýipsizdigine qatysty talaptar tehnikalyq reglamentter men qurylys normalarynda naqty kórsetilgen.
