اباي وبلىسىندا 2025 جىلدىڭ باسىنان بەرى بالالاردىڭ تەرەزەدەن قۇلاۋىنا بايلانىستى ءۇش جاعداي تىركەلدى. بۇل تۋرالى وڭىرلىك كوممۋنيكاسيالار قىزمەتىنىڭ الاڭىندا وتكەن باسپا ءسوز ءماسليحاتىندا وبلىستىق پوليسيا دەپارتامەنتى جەرگىلىكتى پوليسيا قىزمەتى باسقارماسى باستىعىنىڭ ورىنباسارى، پوليسيا پودپولكوۆنيگى باۋىرجان ساداقبايەۆ مالىمدەدى، – دەپ حابارلايدى Dalanews.kz

– ەكى بالا 5-قاباتتان، ءبىر بالا بالكوننان قۇلاپ، جاراقات الدى. ابىروي بولعاندا، ءبارى امان قالدى، ءبىراق باستارىنان جاراقات الىپ، ەمحاناعا جەتكىزىلدى. ەكى اتا-انا اكىمشىلىك قۇقىقبۇزۋشىلىق تۋرالى كودەكستىڭ 127-بابى بويىنشا جاۋاپكەرشىلىككە تارتىلدى، – دەدى ءتارتىپ ساقشىسى.

جازاتايىم وقيعالاردىڭ الدىن الۋ ماقساتىندا پوليسيا قىزمەتكەرلەرى توتەنشە جاعدايلار دەپارتامەنتىمەن بىرلەسىپ، ءبىلىم بەرۋ ۇيىمدارى مەن ەلدى مەكەندەردە پروفيلاكتيكالىق ءىس-شارالار وتكىزىپ كەلەدى. جىل باسىنان بەرى 300-گە جۋىق ءدارىس پەن 75 كەزدەسۋ ۇيىمداستىرىلعان.

اباي وبلىسى توتەنشە جاعدايلار دەپارتامەنتى باستىعىنىڭ ورىنباسارى، ازاماتتىق قورعاۋ پولكوۆنيگى الەكسەي شتىكەلدىڭ مالىمەتىنشە، 2022 جىلدان بەرى وڭىردە بالالاردىڭ تەرەزەدەن قۇلاۋىنا بايلانىستى 32 جاعداي تىركەلگەن، ونىڭ ۇشەۋى — بيىل.

– مۇنداي وقيعالار كوبىنە اتا-انالاردىڭ سالعىرتتىعى مەن بالالاردى قاراۋسىز قالدىرۋ سالدارىنان بولادى. سونداي-اق تەرەزە ماڭىنا جيھازدىڭ دۇرىس ورنالاستىرىلماۋى دا سەبەپ. بۇل فاكتىلەر قىلمىستىق كودەكستىڭ 119-بابى بويىنشا جاۋاپكەرشىلىككە نەگىز بولا الادى، – دەدى ول.

سپيكەردىڭ ايتۋىنشا، بيىلدىڭ وزىندە 1 500-دەن استام ادامدى قامتىعان ءتۇسىندىرۋ جۇمىستارى جۇرگىزىلگەن. تەرەزە قاۋىپسىزدىگىنە قاتىستى تالاپتار تەحنيكالىق رەگلامەنتتەر مەن قۇرىلىس نورمالارىندا ناقتى كورسەتىلگەن.