Úkimet otyrysynda Berik Ýálı Abaı oblysyndaǵy órtke qarsy qabyldanyp jatqan sharalar týraly baıandady, dep habarlaıdy Dalanews.kz
Berik Ýálı jyl basynan beri oblys aýmaǵynda 1 orman órti, 1 dala órti jáne qurǵaq shóptiń 66 janý faktisi tirkelgenin atap ótti. Bıylǵy 4 sáýirde Besqaraǵaı aýdanynda qurǵaq shóptiń janýy saldarynan «Semeı ormany» tabıǵı rezervaty aýmaǵy órtendi. Jalpy janǵan aýmaq aldyn ala esep boıynsha 1,2 myń gektardy qurady. Onyń 400 gektary orman alqaby, 800 gektary jaıylymdyq jer. Rezervatta 1,4 myń gektarda qurǵaq shópti arnaıy órteý jumystary júrgizildi jáne oblys aýmaǵynda 16,3 myń shaqyrym mıneraldy jolaqtar júrgizildi.
«Sonymen qatar, órt qaýipsizdigin qamtamasyz etý maqsatynda oblysta 170 adamnan turatyn 38 mobıldik top quryldy. Arnaıy 7 reıdtik is-shara ótkizilip, órt qaýipsizdik qaǵıdasyn buzýdyń 4 faktisi anyqtaldy», - dep atap ótti Berik Ýálı.
Órt oshaqtaryn erte anyqtaý maqsatynda «QazaqstanǴaryshSapary «UK» AQ-men ózara is-qımyl sheńberinde termıalyq núktelerdiń kosmomonıtorıngi qamtamasyz etildi.
«Semeı ormany» rezervatymen birlesip, eldi mekenderdiń janynda ornalasqan orman alqaptaryn qorǵaý úshin mehanıkalandyrylǵan kúzetter ornalastyrylady.
Sonymen qatar, rezervat aýmaǵynda «Qazavıaormanqorǵaý» respýblıkalyq kásiporynnyń sý tógetin qurylǵylarymen 2 Eurocopter kezekshilik júrgizýde.
Budan bólek Semeı qalasynyń áýejaıy bazasynda «Qazavıaqutqarý» kásipornynyń (MI-8) tikushaǵy jáne Qorǵanys mınıstrliginiń sý tógetin qurylǵylary bar 2 tikushaǵy kezekshilikte tur.
«Aýyl qutqarýshylary» baǵdarlamasy aıasynda Besqaraǵaı aýdanynyń Glýhovka aýylynda órt sóndirý beketi iske qosyldy. Sonymen qatar, jyl sońyna deıin qosymsha 3 órt sóndirý beketteri ashylady.
