QR Premer-Ministri Oljas Bektenov jáne China Nonferrous Metal Mining Co. Ltd. Direktorlar keńesiniń tóraǵasy Si Chjenpin mys salasyndaǵy yntymaqtastyq máselelerin talqylady, – dep habarlaidy Dalanews.kz Abai oblysy ákiminiń baspasóz qyzmetine silteme jasap.
Kezdesý nátijesinde QR Premer-Ministri Oljas Bektenovtiń qatysýymen jyldyq qýaty 300 myń tonna bolatyn mys balqytý zaýytyn salý týraly kelisimge qol qoiyldy. Kelisimge tapsyrys berýshi retinde áreket etetin «Kaz Minerals Smelting» JShS, tehnologiialyq jabdyqty jobalaý jáne satyp alý qyzmetterin jetkizýshi kompaniia China Nonferrous Metal Industry's Foreign Engineering and Construction Co., Ltd. (NFC), sondai-aq qurylys jáne iske qosý-jóndeý jumystarynyń merdigeri «NFC Kazakhstan» JShS kompaniialary arasynda qol qoiyldy.
Zaýyt Abai oblysyndaǵy Aqtoǵai kentiniń mańynda salynady. Shikizat kózi Bozshakól jáne Aqtoǵai taý-ken baiytý keshenderiniń, «Shyǵystústimet» JShS baiytý fabrikalarynyń mys kontsentraty bolmaq. Zaýyt qurylysynyń qorytyndysy boiynsha álemdegi eń iri mys kenishteriniń birin jáne qazirgi zamanǵy mys balqytý óndirisin biriktiretin klaster qurylatyn bolady. Aldyn ala quny $1,5 mlrd bolatyn jobanyń paidalaný kezeńinde 1000-nan astam jańa jumys orny ashylady. Joba 2028 jyldyń sońyna deiin paidalanýǵa beriledi.
Joǵary tehnologiialyq ónim shyǵaratyn kásiporyn respýblikadaǵy eń iri óndiris ornyna ainalmaq. Mys balqytý óndirisi salasynda qoldanylatyn tehnologiialar álemdik ekologiialyq standarttarǵa sáikes keledi.
Kásiporyn naryqtyń quramynda mys bar shikizat pen katodty mys óńdeýge degen ishki qajettilikterin qamtamasyz etedi. Aita ketý kerek, katodty mys elektr energetikasynda, mashina jasaýda jáne basqa da ónerkásip salalarynda keńinen qoldanylady. Sonymen qatar jańa zaýyt tazartylǵan altyn, kúmis jáne kúkirt qyshqylyn shyǵarýdy josparlap otyr.
– Memleket basshysy ornyqty ekonomikalyq ósim mindetin qoidy. Jańa mys balqytý zaýytynyń qurylysy – elimizde óndiriletin mys shikizatyn qaita óńdeý kólemin arttyrýǵa múmkindik beretin jáne ekonomikaǵa eleýli úles qosatyn iri indýstriialyq joba. Mys salasy bizdiń ónerkásiptiń basym sektorlarynyń biri jáne biz úshin onyń qarqyndy damýy óte mańyzdy, – dep atap ótti Oljas Bektenov.
