Jeńis kúni – Uly Otan soǵysy jyldaryndaǵy halqymyzdyń batyrlyǵy men qaisarlyǵyn eske alatyn aitýly mereke. Búgingi jeńis kúnin Abai oblysynda 5 ardager, 2 164 tyl eńbekkeri qarsy aldy.
Jeńistiń 79 jyldyǵy Uly Otan soǵysynyń batyrlaryna arnalǵan memorial saiabaqtaǵy is-sharadan bastaldy. Bul jerde eli úshin janyn qurban etken sarbazdar rýhyna taǵzym etilip, Máńgilik alaýǵa gúl shoqtary qoiyldy.
Sharaǵa oblys ákimi Nurlan Uranhaev, máslihat tóraǵasy, ardagerler, tyl eńbekkerleri, zapastaǵy áskeri qyzmetshiler, «Shyǵys» ÓÁQ ofitserleri, oqýshylar men qala turǵyndary qatysty.
«Elimiz úshin qasterli mereke - Uly Jeńis kúnimen barshańyzdy shyn júrekten quttyqtaimyn! Bul kún – janqiiar erlik pen eńseli eldiktiń rýhy órlep, Jeńis jalaýy jelbiregen uly mereke. Halqymyz «El úmitin er aqtar, er ataǵyn el saqtar» dep, jerine qorǵan bolǵan azamattardy árqashan erekshe qurmetteidi. Biz árqashan Otan úshin ot keshken batyrlar men bozdaqtardy ulyqtap, esimderin máńgi jadymyzda saqtaimyz! Eshkim de, eshqashan umytylmaidy! Erlik Dańqy óshpeidi!» - dedi oblys ákimi.
Sondai– aq, aimaq basshysy óz sózinde Jarma aýdanynyń týmasy Tóleýǵali Ábdibekov pen Ábdiǵali Qaimoldinniń eń joǵary marapat «Halyq qaharmany» ataǵyna ie bolǵanyn atap ótti.
Máńgilik alaý basyna jinalǵandar maidan dalasynan oralmaǵan bozdaqtardy bir minýt únsizdikpen eske aldy. Birneshe myńdaǵan jerlesterimiz qolyna qarý alyp, elin qorǵady. Aralarynan has batyrlar shyqty. Keńes Odaǵynyń Batyry ataǵyna 52 adam laiyqty bolsa, 12-si Dańq ordeniniń tolyq kavaleri boldy.
Is-shara qalalyq Mádeniet úii usynǵan kontserttik baǵdarlamamen jalǵasty. Sondai-aq, alańda qonaqtarǵa maidan ashanasynan soldat kashasy usynyldy.
