جەڭىس كۇنى – ۇلى وتان سوعىسى جىلدارىنداعى حالقىمىزدىڭ باتىرلىعى مەن قايسارلىعىن ەسكە الاتىن ايتۋلى مەرەكە. بۇگىنگى جەڭىس كۇنىن اباي وبلىسىندا 5 ارداگەر، 2 164 تىل ەڭبەككەرى قارسى الدى.

جەڭىستىڭ 79 جىلدىعى ۇلى وتان سوعىسىنىڭ باتىرلارىنا ارنالعان مەموريال ساياباقتاعى ءىس-شارادان باستالدى. بۇل جەردە ەلى ءۇشىن جانىن قۇربان ەتكەن ساربازدار رۋحىنا تاعزىم ەتىلىپ، ماڭگىلىك الاۋعا گۇل شوقتارى قويىلدى.

شاراعا وبلىس اكىمى نۇرلان ۇرانحايەۆ، ءماسليحات ءتوراعاسى، ارداگەرلەر، تىل ەڭبەككەرلەرى، زاپاستاعى اسكەري قىزمەتشىلەر، «شىعىس» ءواق وفيسەرلەرى، وقۋشىلار مەن قالا تۇرعىندارى قاتىستى.

«ەلىمىز ءۇشىن قاستەرلى مەرەكە - ۇلى جەڭىس كۇنىمەن بارشاڭىزدى شىن جۇرەكتەن قۇتتىقتايمىن! بۇل كۇن – جانقيار ەرلىك پەن ەڭسەلى ەلدىكتىڭ رۋحى ورلەپ، جەڭىس جالاۋى جەلبىرەگەن ۇلى مەرەكە. حالقىمىز «ەل ءۇمىتىن ەر اقتار، ەر اتاعىن ەل ساقتار» دەپ، جەرىنە قورعان بولعان ازاماتتاردى ءارقاشان ەرەكشە قۇرمەتتەيدى. ءبىز ءارقاشان وتان ءۇشىن وت كەشكەن باتىرلار مەن بوزداقتاردى ۇلىقتاپ، ەسىمدەرىن ماڭگى جادىمىزدا ساقتايمىز! ەشكىم دە، ەشقاشان ۇمىتىلمايدى! ەرلىك داڭقى وشپەيدى!» - دەدى وبلىس اكىمى.

سونداي– اق، ايماق باسشىسى ءوز سوزىندە جارما اۋدانىنىڭ تۋماسى تولەۋعالي ابدىبەكوۆ پەن ءابدىعالي ءقايمولديننىڭ ەڭ جوعارى ماراپات «حالىق قاھارمانى» اتاعىنا يە بولعانىن اتاپ ءوتتى.

ماڭگىلىك الاۋ باسىنا جينالعاندار مايدان دالاسىنان ورالماعان بوزداقتاردى ءبىر مينۋت ۇنسىزدىكپەن ەسكە الدى. بىرنەشە مىڭداعان جەرلەستەرىمىز قولىنا قارۋ الىپ، ەلىن قورعادى. ارالارىنان حاس باتىرلار شىقتى. كەڭەس وداعىنىڭ باتىرى اتاعىنا 52 ادام لايىقتى بولسا، 12ء-سى داڭق وردەنىنىڭ تولىق كاۆالەرى بولدى.

ءىس-شارا قالالىق مادەنيەت ءۇيى ۇسىنعان كونسەرتتىك باعدارلامامەن جالعاستى. سونداي-اق، الاڭدا قوناقتارعا مايدان اسحاناسىنان سولدات كاشاسى ۇسىنىلدى.