Abai oblysy boiynsha Ekonomikalyq tergep-tekserý departamenti 5 qarjy piramidanyń zańsyz qyzmetin toqtatty. Bul týraly Óńirlik kommýnikatsiialar qyzmetinde ótken brifingte oblystyq Ekonomikalyq tergep-tekserý departamenti basshysynyń orynbasary Oryn Turlybaev málimdedi, – dep habarlaidy Dalanews.kz.
– 2023 jyly 5 qarjy piramidasynyń qyzmeti joiylyp, 3 qylmystyq is sotqa joldandy. Qarjy piramidalary, internet keńistigindegi jarnamalyq siltemelerdiń barlyǵy "Kibernadzor" AJ arqyly buǵattalyp otyrady. Bul jobany QR Qarjy monitoringi agenttigi ázirlegen bolatyn. Búginde Departament buǵattalǵan 1200-den astam saitty (qarjy piramidalary, zańsyz oiyndar qatysty siltemeler) anyqtady, – dedi Oryn Turlybaev.
Departament qarjy piramidalarynyń qyzmetin joiýmen qatar ,saýda jáne basqa da ekonomikalyq sektorlardaǵy zańsyz áreketterdi qatań baqylaýda ustap otyrady.
– Júrgizilgen jedel izdestirý jumystary barysynda sáikestendirýsiz kontrafaktilik temeki jetkizýdiń iri arnasy toqtatyldy. Aktsizdik alym somasy 1,5 mlrd teńgeni quraǵan. Osy másele boiynsha basqa eldiń eki azamatyna tergeý jumystary júrgizilýde. Tergeý barysynda 63 myńnan astam qorap temeki joiylyp, 5 myńnan astam sýrrogat alkogol tárkilendi. Sondai-aq, 9 myńnan astam jalǵan esepke alý-baqylaý markalary tabylyp, Semei qalasynyń eki sport barynda zańsyz oiyn qyzmeti toqtatyldy, – dedi Ekonomikalyq tergeý departamenti basshysynyń orynbasary.
Spiker áleýmettik mańyzy bar azyq-túlik taýarlaryna baǵany qadaǵalaý jáne ónimsiz deldaldardy anyqtaý boiynsha jumystar bastalǵandyǵyn atap ótti.
Airan men un siiaqty ónimderdi satý kezinde baǵany kóterý faktileri anyqtalǵan. Qazirgi ýaqytta JShS-niń birine unǵa arnalǵan saýda ústemesiniń (15%) mólsherinen asyp ketkeni úshin eskertý jasaldy. Basqa taýarlar boiynsha da tekserister júrgizilýde.
Qorytyndylai kele ekonomikalyq tergeý departamenti azamattardy abai bolýǵa jáne óz jinaqtaryn kúmándi qarjy uiymdaryna salmaýǵa shaqyrdy. Eger sizge ekonomikalyq quqyq buzýshylyq, sondai-aq urlyq faktilerin baiqasańyz departamenttiń senim telefonyna habarlasýyńyzdy suraimyz: 33-20-74 nemese "AFM Insider" jedelhat-boty (QR-kod arqyly da bolady).
