Sozaq aýdany, Abai aýylynda 35/10 kV «Tórtshi» dep atalatyn qosalqy stantsiia iske qosylyp, aýyl turǵyndary kópten kóterip júrgen túitkildi máseleniń túiini sheshildi, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Jańa stantsiiany iske qosý rásimine aýdan ákimi Muhit Turysbekov arnaiy qatysyp, jergilikti turǵyndardyń qýanyshyna ortaqtasty. Jańa podstantsiiany iske qosý arqyly Baldysý jáne Qarabulaq eldi mekenderiniń de elektr energiiasy qýatyn arttyrý kózdelgenin atap ótti. Sondai-aq aldaǵy ýaqytta aýdanda halyq suranysyna orai atqarylatyn ózge de jobalarǵa jeke-jeke toqtalyp, josparlarymen bólisti.
«Ońtústik Jaryq Tranzit» JShS tehnikalyq qaýipsizdik qyzmetiniń basshysy Merei Tólenbekuly jańa stantsiianyń qýattylyǵymen tanystyrdy.
Eske sala ketsek, ótken jyldyń qańtar aiynda Abai aýylyna keletin 10 kV quraityn áýe jelisi jeldiń ótine qolaisyz ornalasqannyń saldarynan 13 shaqyrymdaǵy 200-ge jýyq baǵana qulap, turǵyndar birneshe kún áýre-sarsańǵa tústi.
Oryn alǵan jaittan soń turǵyndar elektr jelisin qolaily baǵytqa almastyrý jóninde birneshe ret másele kóterdi. Buǵan qosa Baldysý jáne Qarabulaq eldi mekenderinde elektr energiiasy qýatynyń jetispeýi syndy máseleler de aitylyp keldi. Bul boiynsha aýdan basshysy quzyrly mekeme basshylarymen ózara kelissózder júrgizdi.
Nátijesinde Abai aýyly Sholaqqorǵan-Sozaq baǵytyndaǵy 35 kV joǵarǵy kerneýli áýe jelisine qosyldy. 9,5 shaqyrymdy quraityn qashyqtyqqa 84 dana SV164 markaly baǵanalar turǵyzyldy. Aýyl mańynan qýattylyǵy 1600 kVA syrtqy úlgidegi qosalqy podstantsiia salynyp, iske qosyldy. Turǵyndar jańa stantsiiany «Tórtshi» dep ataý jóninde biraýyzdan usynys tastaǵan.
