Jórgeginde satylyp, jatjurtta jatbaýyr bolyp ósken jigittiń máselesi biraz bylyqtyń betin ashatyn siiaqty. Jan Eddidi taýyp bergen belgili jýrnalist, «Barmysyń, baýyrym?» radiohabarynyń júrgizýshisi Qymbat Dosjan 2000-2004 jyldar aralyǵynda Arqalyq qalasyndaǵy balalar úiinen 80-nen asa balany sheteldikter asyrap alǵanyn aitady.
Belgiiaǵa satylyp ketken qazaq balasynyń isi bas prokýrorǵa joldanǵan. Bul týraly Qymbat hanym: «Arqalyq qalalyq politsiia basqarmasynda Belgiia azamaty Jan Eddidiń atynan jáne Qazaqstandaǵy zańdy ókili retinde meniń atymnan sotaldy tergep-tekserý boiynsha is qozǵalǵan bolatyn. Alaida qylmystyq is qandai da bir qylmystyq quqyqbuzýshylyq quramy bolmaýyna bailanysty qysqartyldy.
Qazirgi jańalyǵymyz Jan Eddidi asyrap alǵan belgiialyq azamatsha Qazaqstanǵa kelmei turyp, Jánibek Jumaǵulovtyń sýreti men jeke málimetin elektrondy poshta arqyly alǵanyn málimdedi. Odan bólek, asyrap alǵan adam Arqalyqqa kelgennen keiin bir kisige qomaqty qarjy bergenin de aitty», – deidi.
Jazbamyzdyń basynda eskertkenimizdei, Eddi áńgimesiniń sońy biraz bylyqtyń betin ashatyn siiaqty degenimiz sol. Bul jerde Jánibektiń qomaqty aqshaǵa satylǵany anyq bolyp otyr. Ony kim satty? Qymbat Dosjan hanym málimdegen Arqalyq balalar úiinen satylǵan seksen bala qazir qaida?
Olardy kim nemese kimder saýdaǵa saldy? Aqshany jeke adam aldy ma, álde balalar úiine aýdaryldy ma? Ol kezde balalar úiiniń basshysy kim edi? Osy suraqtar tereń zertteýdi qajet etedi. Sonymen birge, sábi saýdasynyń artynda qandai iri tulǵalardyń turǵanyn, kimderdiń ruqsat bergenin ashyq aitatyn ýaqyt ta jetken siiaqty...
Q.Dosjan Jan Eddimen birge balalar úiinen satylǵan seksen balanyń taǵdyryna alańdap suraý salypty.
«Bul balanyń barlyǵy zańdy túrde shetel asty ma? Osy málimetterdi eskere otyryp, bizdegi saraptama jáne zertteý qorytyndylaryn negizge ala otyryp, Arqalyq qalalyq politsiia basqarmasynda qozǵalyp, keiin toqtatylǵan isti tek «salǵyrttyq» baby boiynsha emes, «kámeletke tolmaǵandar saýdasy» boiynsha qaita qozǵalýyn surap elimizdiń Bas prokýroryna xat joldadyq.
Redaktsiia Parlament Májilisiniń depýtaty zańnama jáne sot quqyqtyq reforma komitetiniń múshesi Abzal Quspanmen de jolyǵyp, zańgerlik keńes aldy. Depýtat bul mańyzdy máselege budan ári qarai da kómek beretinin aitty», – deidi.
Qymbat Dosjannyń aitýynsha, resmi organdarǵa joldanǵan hattardan keiin mańyzdy sheshim qabyldanýy kerek. Bul jaǵdai Memleket basshysynyń da nazaryna jetken.
Esterińizge sala ketsek, Eddi Jan dúniege kelgende, oǵan «Jánibek» degen keremet esim berilgen. Alaida ol ózin Murat dep ataidy eken. Onyń sebebi osy ýaqytqa deiin aityldy.
