Bul týraly oblystyń Ishki saiasat basqarmasynyń basshysy Beisen Tájibaev áleýmettik jelidegi paraqshasynda jazdy.
"Elbasynyń aldynda aqtaryla sóilep, el razylyǵyna bólengen Batyr ananyń ómiri jaqsylyqqa kúrt ózgerdi degen osy shyǵar. Al Astanadan - Shymkentke poezben shyqqan Jazira, sol sátten bastap atynyń shartarapty sharlap keterin de bilgen joq.
Búgin, qasietti jumada kieli Túrkistanda oblys basshysy Janseiit Túimebaevtyń qolynan baspananyń kiltin alǵan Batyr ana óń men tústiń ortasynda ǵajaiyp kúi keship tur", – dedi ol.
Úi Lenger qalasynan berildi. Al Jaziranyń joldasy Oljas Ábildabekov aldaǵy ýaqytta arnaiy oqytý kýrstan ótkizilip, jumysqa ornalasatyn boldy.
Aita ketsek, budan buryn 7 balanyń anasy Jazira Turǵynovanyń Shymkenttiń túbinde páter jaldap turyp jatqany habarlanǵan.
Bul kúnde 4 ul men 3 qyz tárbielep otyrǵan erli-zaiyptynyń tuńǵyshtary 9 jasqa tolyp otyr. Al, sút kenjeleri segiz ailyq. Jas aralyqtary 1 jas bir aidan bastalady.
Kópbalaly ana otbasynyń turmystyq jaǵdaiy kóńil kónshitpeitinin aitqan bolatyn. "Kúieýim áli kúnge jumys tapqan joq. Tek ýaqytsha jumysqa jaldanyp, januiasyn asyraýda", – degen edi Jazira Turǵynova.
Buǵan óńir basshysy Janseiit Túimebaev birden nazar aýdaryp, baspana berdi. Osylaisha kóp balaly otbasynyń eń basty máselesi sheshildi.
