Aqtóbede Ekonomikalyq tergep-tekserý departamentiniń burynǵy tergeýshisine jáne onyń áriptesine qatysty sot úkimi shyqty. Tergeý nusqasy boiynsha, olar kópmilliondyq para talap etti dep aiyptalǵan, dep habarlaidy dalanews.kz.
Sot materialdaryna sáikes, burynǵy tergeýshi qarjy piramidasyna qatysty isti júrgizgen. Aiyptaý tarapynyń málimetinshe, ol is figýrantyna uzaq merzimge sottalýy múmkin ekenin aityp qysym kórsetken, dep jazady diapazon.kz.
Keiin tergeýshi qylmystyq isti toqtatýǵa ýáde berip, 50 mln teńge talap etken. Aiyptaý nusqasy boiynsha, aqshany alý úshin ol áriptesin deldal retinde tartqan.
Alaida kásipker bul týraly UQK-ge habarlaǵan. Deldal parany alyp jatqan kezde ustalǵan. Tergeý málimetinshe, berilgen aqshanyń basym bóligi jalǵan kýpiýralar bolǵan. Keiin burynǵy tergeýshiniń ózi de qolǵa túsken.
Sot eki aiyptalýshyny da kináli dep tanydy. Burynǵy tergeýshi 10 jylǵa bas bostandyǵynan aiyrylsa, onyń sybailasy 2 jylǵa sottaldy. Sonymen qatar ekeýine de ómir boiyna memlekettik qyzmette jumys isteýge tyiym salyndy.
