Ақтөбеде Экономикалық тергеп-тексеру департаментінің бұрынғы тергеушісіне және оның әріптесіне қатысты сот үкімі шықты. Тергеу нұсқасы бойынша, олар көпмиллиондық пара талап етті деп айыпталған, деп хабарлайды dalanews.kz.
Сот материалдарына сәйкес, бұрынғы тергеуші қаржы пирамидасына қатысты істі жүргізген. Айыптау тарапының мәліметінше, ол іс фигурантына ұзақ мерзімге сотталуы мүмкін екенін айтып қысым көрсеткен, деп жазады diapazon.kz.
Кейін тергеуші қылмыстық істі тоқтатуға уәде беріп, 50 млн теңге талап еткен. Айыптау нұсқасы бойынша, ақшаны алу үшін ол әріптесін делдал ретінде тартқан.
Алайда кәсіпкер бұл туралы ҰҚК-ге хабарлаған. Делдал параны алып жатқан кезде ұсталған. Тергеу мәліметінше, берілген ақшаның басым бөлігі жалған купюралар болған. Кейін бұрынғы тергеушінің өзі де қолға түскен.
Сот екі айыпталушыны да кінәлі деп таныды. Бұрынғы тергеуші 10 жылға бас бостандығынан айырылса, оның сыбайласы 2 жылға сотталды. Сонымен қатар екеуіне де өмір бойына мемлекеттік қызметте жұмыс істеуге тыйым салынды.
