AQSH Reseıge 100 paıyz ımporttyq baj salyǵyn engizýdi josparlap otyr. Bul týraly AQSH prezıdenti Donald Tramp málimdedi, dep habarlaıdy Dalanews.kz.
Onyń sózinshe, eger Máskeý men Vashıngton 50 kúnniń ishinde Ýkraına boıynsha beıbit kelisimge kele almasa, jańa shekteý sharalary kúshine enedi.
“Biz Reseı tarapyna óte qatty narazy bolyp otyrmyz. Eger kelisim 50 kún ishinde jasalmasa, asa qatań tarıfter engizemiz. Bul tarıfterdiń kólemi shamamen 100 paıyz bolady. Olardy ekinshilik tarıfter dep te ataýǵa bolady”, — dedi Tramp Aq úıde NATO Bas hatshysy Mark Rúttemen kezdesý kezinde.
“Men eki aı buryn biz mámilege kelemiz dep oılaǵan edim”, — dep qosty ol, Ýkraınany beıbit jolmen retteýge qatysty kelissózderdi meńzep.
Aıta ketsek, 8 shilde kúni AQSH prezıdenti Donald Tramp Qazaqstan basshysy Qasym-Jomart Toqaevqa hat joldap, 1 tamyzdan bastap qazaqstandyq taýarlarǵa 25 paıyzdyq baj salyǵy salynatynyn eskertken edi.
