Astana qalasynyń mańyndaǵy Talapker aýylynda kókpar uiymdastyryldy, dep habarlaidy elorda ákimdiginiń resmi saity.
Qazaqstan úshin 2024 jyldaǵy basty sporttyq básekelerdiń biri – Parij Olimpiadasy bolsa, ekinshi kezekte – V Dúniejúzilik kóshpendiler oiyndary. Astana qalasynda ótetin halyqaralyq sharaǵa álemniń 89 elinen sportshylar keledi.
1 ai ǵana ýaqyt qalǵan dodany qoǵam arasynda keńinen tanytý úshin elimizdiń barlyq óńirinde «Birlik kerýeni» atty top quryldy. Bul topqa arnaiy iriktelgen 10 sporttaǵy qairatkerler, jýrnalister kirdi. Mine, búgin osy kóshpendiler oiynynyń baǵdarlamasyna kiretin sporttardy nasihattaý maqsatynda kókpardan sheberlik dárisi ótti.
«Kókpar – qazaqtyń baiyrǵy zamannan kele jatqan ulttyq sporttyń túri. XXI ǵasyr jahandaný kezeńimen tuspa-tus kelgenimen, ulttyq dástúrimiz de aqyryndap umytylyp barady. Kúzde alǵash ret uiymdastyrylatyn V Dúniejúzilik kóshpendiler oiyndarynyń da mańyzy zor. Kei adamdar úshin bul júlde jiyntyǵy sarapqa salynatyn qarapaiym ǵana jarys bolsa, biz úshin bul ata-babamyzdan qalǵan dástúrimizdi jańǵyrtý, keleshek urpaqqa aityp qana qoiý ǵana emes, is-júzinde kórsetý dep bilemin. Bunymen shektelmeimiz. Aldaǵy kúnderi atqa otyrý, asyq atý t.b sport túrlerinen de sheberlik dárisi ótkiziledi», — dedi Astana qalasynyń kókpardan jattyqtyrýshysy Erlan Qanapin.
Aita keteiik, 2017 jyldan bastaý alǵan Dúniejúzilik kóshpendiler oiyny elordamyzda 8-13 qyrkúiek aralyǵynda ótedi. Sondai-aq, «Birlik kerýeni» jobasy elimizdiń barlyq aimaǵynda uiymdastyrylýda.
Kóshpendiler mádenietiniń negizinde qurylǵan «Birlik Kerýeni» 5-shi Dúniejúzilik kóshpendiler oiyndaryn respýblika kóleminde sezinýge múmkindik beredi deidi uiymdastyrýshylar.
