استانا قالاسىنىڭ ماڭىنداعى تالاپكەر اۋىلىندا كوكپار ۇيىمداستىرىلدى، دەپ حابارلايدى ەلوردا اكىمدىگىنىڭ رەسمي سايتى.

قازاقستان ءۇشىن 2024 جىلداعى باستى سپورتتىق باسەكەلەردىڭ ءبىرى – پاريج وليمپياداسى بولسا، ەكىنشى كەزەكتە – V دۇنيەجۇزىلىك كوشپەندىلەر ويىندارى. استانا قالاسىندا وتەتىن حالىقارالىق شاراعا الەمنىڭ 89 ەلىنەن سپورتشىلار كەلەدى.

1 اي عانا ۋاقىت قالعان دودانى قوعام اراسىندا كەڭىنەن تانىتۋ ءۇشىن ەلىمىزدىڭ بارلىق وڭىرىندە «بىرلىك كەرۋەنى» اتتى توپ قۇرىلدى. بۇل توپقا ارنايى ىرىكتەلگەن 10 سپورتتاعى قايراتكەرلەر، جۋرناليستەر كىردى. مىنە، بۇگىن وسى كوشپەندىلەر ويىنىنىڭ باعدارلاماسىنا كىرەتىن سپورتتاردى ناسيحاتتاۋ ماقساتىندا كوكپاردان شەبەرلىك ءدارىسى ءوتتى.

«كوكپار – قازاقتىڭ بايىرعى زاماننان كەلە جاتقان ۇلتتىق سپورتتىڭ ءتۇرى. XXI عاسىر جاھاندانۋ كەزەڭىمەن تۇسپا-تۇس كەلگەنىمەن، ۇلتتىق ءداستۇرىمىز دە اقىرىنداپ ۇمىتىلىپ بارادى. كۇزدە العاش رەت ۇيىمداستىرىلاتىن V دۇنيەجۇزىلىك كوشپەندىلەر ويىندارىنىڭ دا ماڭىزى زور. كەي ادامدار ءۇشىن بۇل جۇلدە جيىنتىعى ساراپقا سالىناتىن قاراپايىم عانا جارىس بولسا، ءبىز ءۇشىن بۇل اتا-بابامىزدان قالعان ءداستۇرىمىزدى جاڭعىرتۋ، كەلەشەك ۇرپاققا ايتىپ قانا قويۋ عانا ەمەس، ىس-جۇزىندە كورسەتۋ دەپ بىلەمىن. بۇنىمەن شەكتەلمەيمىز. الداعى كۇندەرى اتقا وتىرۋ، اسىق اتۋ ت.ب سپورت تۇرلەرىنەن دە شەبەرلىك ءدارىسى وتكىزىلەدى»، — دەدى استانا قالاسىنىڭ كوكپاردان جاتتىقتىرۋشىسى ەرلان قاناپين.

ايتا كەتەيىك، 2017 جىلدان باستاۋ العان دۇنيەجۇزىلىك كوشپەندىلەر ويىنى ەلوردامىزدا 8-13 قىركۇيەك ارالىعىندا وتەدى. سونداي-اق، «بىرلىك كەرۋەنى» جوباسى ەلىمىزدىڭ بارلىق ايماعىندا ۇيىمداستىرىلۋدا.

كوشپەندىلەر مادەنيەتىنىڭ نەگىزىندە قۇرىلعان «بىرلىك كەرۋەنى» 5ء-شى دۇنيەجۇزىلىك كوشپەندىلەر ويىندارىن رەسپۋبليكا كولەمىندە سەزىنۋگە مۇمكىندىك بەرەدى دەيدى ۇيىمداستىرۋشىلار.