5 balany dúniege ákelgen analarǵa mindetti túrde baspana berilsin
Kesheden bastap eldiń qabyrǵasyn qaiystyrǵan 5 balanyń qazasyna bailanysty óz atymnan qaiǵyǵa ortaqtasyp, ata-anasyna, týǵan-týystaryna kóńil aitamyn!
Rasynda, et pen súiekten jaralǵan adam balasynyń barlyǵynyń júregi ezilip, súiegi syrqyraǵan oqiǵa.
Qazir, «buǵan kináli kim?» degen máseleden kóri, endi mundai oqiǵa qaitalanbaityndai áreketterge kóship, naqty sheshimder qarastyrýymyz kerek dep esepteimin!
Endigi, bul oqiǵadan sabaq alyp, ony boldyrmaýdyn jolyn tabamyz, tappasaq – óz dertimizge ózimiz tunshyǵamyz!
Sondyqtan, birinshiden, meniń naqty ustanymym - 5 balany dúniege ákelgen analarǵa mindetti túrde baspana sózsiz berilýi kerek!
Biraq tek memlekettiń moinyna máseleni ilip qoiý da jón emes, qoǵam da osy iske birdei atsalysýy kerek. Sózden iske kósheiik! Naqty qadam jasaý úshin endi qansha balany qurban etip, qansha ananyń kóz jasy tógilýi kerek?! Bul eń aldymen jasalynatyn shuǵyl shara!
Ekinshiden, Eńbek jáne halyqty áleýmettik qorǵaý ministrlikten osyndai muqtaj jandardyń sanyn, olar týraly málimeti bizge berýdi suraimyn! Óz tarapymyzdan tez arada qajetti jumysty uiymdastyraiyq, kómek berýge nietti kásipkerlerdiń tizimin jasap, kómek berý jumysyna kósheiik!
Osyndai tyǵyryqqa tirelgen azamattardyń máselesin bile otyra, «Meniń atamekenim» jobasyn qolǵa alǵan edik. Bul platforma, osy aptanyń aiaǵynda, 8 aqpanda iske qosylady.
Búginde jaqyn arada sheshimin kútip otyrǵan 17 895 áleýmettik másele osy júiege tirkeldi. Kómekke zárý azamattarymyzdyń qajettiligin bir júiege tirkep, kásipkerler tarapynan qoldaý kórsetiledi.
Kózi ashyq, kókiregi oiaý azamattardy bul bastamany qoldaýǵa shaqyramyn.
Bul kómek emes, el aldyndaǵy, qoǵam aldyndaǵy mindet dep túsineiik!
