Buǵan deıin habarlaǵandaı, tólemdi esepteý úshin alǵashqy aı retinde 16 naýryzdan bastap 15 sáýir aralyǵy alynady. Qazirgi tótenshe jaǵdaı boıynsha ekinshi aı 16 sáýirden 11 mamyrǵa deıin belgilengen.
Joǵaryda aıtqanymyzdaı, 16 sáýirge deıin ótinish bergen azamattar (áleýmettik járdemaqylar taǵaıyndaý qashan jasalǵanyna qaramastan), tótenshe jaǵdaı kezinde tabysynan aıyrylýyna baılanysty Memlekettik áleýmettik saqtandyrý qorynan tólemder taǵaıyndaý erejesinde kórsetilgen sharttardy saqtaı otyryp, «42 500 teńge» tólemge ekinshi aıda úmitker bola alady. 16 sáýirden bastap 11 mamyr kúni saǵat 18.00-ge deıin ótinish bergen azamattar bir ret tólem ala alady.
Esterińizge sala keteıik, tótenshe jaǵdaı rejıminiń toqtatylýyna baılanysty 2020 jylǵy 11 mamyrda saǵat 18.00-den bastap «42 500 teńge» tólemin taǵaıyndaýǵa jańa ótinishterdi qabyldaý aıaqtaldy.
Joǵaryda kórsetilgen merzimge deıin kelip túsken barlyq ótinishter belgilengen tártippen qaralyp, ótinimder tótenshe jaǵdaı kezinde tabysynan aıyrylýyna baılanysty MÁSQ-tan tólemder taǵaıyndaý qaǵıdalaryna sáıkes kelgen jaǵdaıda «42 500 teńge» áleýmettik tólem taǵaıyndalady jáne tólenedi.
Buryn berilgen ótinishti qaraý mártebesin 42500.enbek.kz saıtynda bilýge bolady. «42 500 teńge» tólemi engizilgen sátten bastap ony 4,5 mln adam aldy.
QR Eńbek jáne halyqty áleýmettik qorǵaý mınıstrliginiń baspasóz qyzmeti
