17 sáýir kúni tańǵy saǵat 04:05-te Jańaózen qalasynda 12-páterli 2 qabatty turǵyn úıdiń ekinshi kireberisinde jarylys boldy. Boljam boıynsha gaz qospasy tógilip, 150 sharshy metr aýmaqqa zıan keldi.
Qaıtys bolǵadar sany – 4 adam.
Saǵat 10:45 jaǵdaı boıynsha 13 adam medısınalyq kómekke júgindi. Onyń ishinde 8 bala, 6 adam aýrýhanaǵa jatqyzylsa, 7 adam úıge jiberildi.
Jarylys kezinde 3 páterge zıan kelgen. Apattan keıin úı gaz jelisinen birden ajyratylady. Qazirgi ýaqytta úıindilerdi tazalaý jumystary júrgizilýde. Apattyń sebebi men mán-jaıy tolyq anyqtalady.
Aımaq basshysy Nurlan Noǵaev Jańaózen aýrýhanasyna jatqyzylǵan apattan zardap shekken turǵyndardyń jaıyn bildi.
Bul jerde vedomstvoaralyq komısıa jumys isteıdi, jarylys deregi boıynsha qylmystyq is qozǵaldy.
Aýrýhanaǵa jatqyzylǵandardyń barlyǵy travmatologıa bólimshesinde em alady. Al jaǵdaıy aýyr turǵyndar jansaqtaý jáne qarqyndy terapıa anestezıologıa bólimshesine, bir pasıent oblystyq aýrýhanaǵa jedel avıasıalyq tikushaqpen jetkiziledi.
– Qaıtys bolǵan azamattardyń otbasyna qaıǵyra kóńil aıtamyn. Zardap shekkenderge jáne olardyń otbasylaryna materıaldyq kómek kórsetiledi, jańa turǵyn úı beriledi. Apattyq jumystarǵa kómek kórsetken eriktiler men qala turǵyndaryna alǵys aıtamyn. Qazirgi ýaqytta barlyq adam úıindilerden shyǵaryldy, – dedi Nurlan Noǵaev.
Úıindilerdi tazartý jumystary jalǵasýda
