Oljas Bektenov Úkimettik komissiianyń Aqtaý qalasy mańynda bolǵan ushaq apaty ornyndaǵy jumysy týraly aqparatty tyńdady, dep habarlaidy Dalanews.kz.
Premer-ministr Oljas Bektenov QR Úkimeti janyndaǵy Quqyq buzýshylyqtyń aldyn alý jónindegi vedomstvoaralyq komissiia otyrysy sheńberinde kún tártibinen tys Premer-ministrdiń orynbasary Qanat Bozymbaevtyń Aqtaý qalasy mańyndaǵy ushaq apaty ornyndaǵy Úkimettik komissiianyń jumysy týraly esebi tyńdaldy.
Qutqarý qyzmeti izdeý jumystaryn aiaqtady. Ushaq apaty saldarynan 29 adam aýrýhanaǵa jatqyzyldy, 38 adam qaza tapty. Patsientter túrli jaraqattarmen, negizinen kóptegen jaraqatpen túsken. Jaǵdai turaqtanǵannan keiin olar profilder boiynsha aýrýhanaǵa jatqyzyldy, tolyq kólemde em alýda. Sondai-aq sanitarlyq aviatsiia jelisi arqyly Astanadan Ulttyq shuǵyl meditsina ortalyǵy men jetekshi respýblikalyq ortalyqtardyń joǵary bilikti mamandary keldi. Qazaqstandyq mamandardan bólek RF TJM arnaiy keńesi men Ázerbaijan Respýblikasynyń sanitarlyq aviatsiia brigadasy da keldi. Zardap shekkender men qaza tapqandardyń týystary keledi, olarǵa oblys ákimdigi transfert, ornalastyrý jáne tamaqtaný boiynsha qajetti kómek kórsetedi. Psihologtar toby jumys istep jatyr.
Óz kezeginde Kólik ministrligi Ázerbaijan Respýblikasy Úkimetimen birlesip jumys isteidi. Erteń Braziliianyń aviatsiialyq biligi men Embraer kompaniiasy keledi dep kútilýde. Túpqaraǵan aýdanynda jergilikti tehnogendik sipattaǵy tótenshe jaǵdai rejimi jariialandy.
Prezident Qasym-Jomart Toqaevtyń tapsyrmasy boiynsha zardap shekkenderge tolyq kólemde meditsinalyq kómek kórsetilip qaza tapqandardyń týystary men jaqyndaryna qajetti qoldaý sharalary kórsetilýde. Qazirgi ýaqytta jedel jeli jumys istep tur, oǵan myńnan astam qońyraý tústi.
«Birinshi kezekte qaza tapqandardyń týystary men jaqyndaryna kóńil aitamyn. Qazaqstan Úkimeti men ýákiletti organdar zardap shekkenderge jáne qaitys bolǵandardyń týystaryna barlyq qajetti kómekti kórsetýde», — dep atap ótti Oljas Bektenov.
Sonymen qatar Premer-ministr aviatsiialyq qaýipsizdikti kúsheitý jóninde birqatar tapsyrma berdi.
«Bul qaiǵyly jaǵdai, bizge de ushý qaýipsizdigi boiynsha tiisti sharalardy qabyldaý kerektigin bildiredi. Birinshi kezekte jospardan tys tekserý júrgizý jáne áýejailardyń, áýe kemeleriniń tehnikalyq jaǵdaiyn erekshe baqylaýǵa alý qajet. Ótkizilip otyrǵan is-sharalardyń sheńberinde otandyq aviakompaniialar ekipajdardyń biliktiligin, ruqsatnamalaryn jáne quzyretin qaita tekserý kerek. Sondai-aq áýe oqiǵalaryna jedel den qoiý maqsatynda apattyq-qutqarý jumystaryn jetildirý jáne múddeli memlekettik organdardyń úilesimdi jumysyn qamtamasyz etý qajet.Oryn alǵan jaǵdaidan osyndai oqiǵalardy aldaǵy ýaqytta boldyrmaý úshin naqty usynystardy ázirlei otyryp durys qorytyndy shyǵarý qajet», — dep atap ótti Premer-ministr.
