Atyraýlyq bloger Zaida Onýora Threads jelisinde Air Astana áýe kompaniiasynan 315 myń teńgege bilet satyp alǵannan keiin reisi kútpegen jerden FlyArystan áýe kompaniiasyna aýystyrylǵanyn aitty, dep habarlaidy dalanews.kz.
Onyń sózinshe, habarlama túngi saǵat 23:10 shamasynda, ushýǵa 12 saǵattan az ýaqyt qalǵanda kelgen.
"Nelikten 315 myń teńgege bilet alamyn da, túngi 23:10-da meni FlyArystan reisine aýystyratyndaryn jazady? Ushýǵa 12 saǵat qaldy", - dep jazdy bloger.
Pikir jazǵan ózge qoldanýshylar da osyndai jaǵdaiǵa tap bolǵanyn aitty. Olardyń biri mundai jaǵdai Atyraýdan ushatyn reisterde jii kezdesetinin jetkizdi. Onyń aitýynsha, reis loýkosterge aýystyrylǵannan keiin biznes klass úshin tólegen qarajattyń aiyrmasyn birneshe ret qaitarýǵa tyrysqanymen, nátije bolmaǵan. Onyń ornyna ushar aldynda 25 myń teńgelik vaýcher usynylǵan.
Taǵy bir qoldanýshy dál osyndai jaǵdai Aqtóbede de bolǵanyn aitty. Onyń sózinshe, balalary ushý kezinde mýltfilm kórip, borttaǵy tamaqty ishsin dep Air Astana-ny ádeii tańdaǵan. Alaida ushar aldynda olardyń reisi de FlyArystan-ǵa aýystyrylǵany habarlanǵan.
Áýe kompaniia ushaqtyń aýystyrylýy májbúrli shara ekenin málimdedi. Kompaniianyń málimetinshe, bul ushý kestesindegi túrli irkilisterge bailanysty bolady.
"Ushaq aýystyrylýy - ushaq kesh kelýi nemese tehnikalyq sebepterden reis keshigýi siiaqty jaǵdailarda qabyldanatyn májbúrli shara", - dep málimdedi Air Astana ókilderi.
