Aldaǵy úsh táýlik ishinde Qazaqstan aýmaǵynyń basym bóligi keń aýqymdy antitsiklonnyń yqpalynda bolady, sonyń áserinen jaýyn-shashynsyz aýa raiy kútiledi, dep habarlaidy Dalanews.kz.
Tek eldiń batys, ońtústik jáne ońtústik-shyǵys óńirleri atmosferalyq frontaldy bólimderdiń yqpalynda qalyp, jańbyr men qar túrindegi jaýyn-shashyn, tómengi boran, kóktaiǵaq kútiledi. Túrkistan oblysynyń taýly aimaqtarynda 31 qańtarda kúshti jaýyn-shashyn (jańbyr, qar) boljanady. Respýblika boiynsha tuman, jeldiń kúsheiýi kútiledi.
Aýa temperatýrasyna keletin bolsaq, respýblikanyń barlyq aýmaǵynda birtindep joǵarylaý baiqalady. 31 qańtar kúndiz aýa temperatýrasy batys, ońtústik jáne ońtústik-shyǵys óńirlerde –5°S-tan +5°S-qa deiin, al soltústik-batysta, soltústikte, shyǵysta jáne eldiń ortalyǵynda –2°S-tan –10°S-qa deiin jetedi.
