Almatyda «NIS HACKATHON-2024» alǵashqy IT chempionaty aiaqtaldy
Almatydaǵy himiia-biologiia baǵytyndaǵy NIS-te elimizdiń barlyq Ziiatkerlik mektepterinen 180-ge jýyq úzdik baǵdarlamalaýshylar qatysqan eki kúndik IT-marafonnyń saltanatty jabylýy ótti.
Joǵarǵy jáne kishi ligadaǵy komandalarǵa «EdTech» taqyrybynda 24 saǵat ishinde bilim berý salasynda usynylǵan segiz máseleniń birin tańdap, ózderiniń baǵdarlamalyq ónimderin jasap shyǵarý arqyly máseleniń tehnologiialyq sheshimin tabý tapsyrylǵan bolatyn.
Oqýshylar bir táýlik ishinde aqparattyq tehnologiianyń sońǵy trendterin, paidalana otyryp, 44 baǵdarlamalyq ónim ázirlep rekord ornatty. Ziiatkerler jasaqtaǵan mobildi qosymshalary, saittar, web-servizderinde jasandy intellekttiń túrli ádisterin qoldana bildi. AI kómegimen úlken kólemdegi derekterdi taldaýdy, mátinderdi, sýretterdi, mýzyka men beinelerdi jasaýdy, muǵalimderge tapsyrmalardy tekserýdi jeńildetýdi, STEM oqytýdyń tiimdiligin arttyrýdy, gitarada oinaýdy úiretýdi, bolashaq mamandyqty tańdaýǵa kómektesýdi oilastyryp kompiýterlik algoritmderge shyǵarmashylyq jáne intellektýaldy mazmun bere aldy. Sonymen qatar oqýshylar jasandy intellektti biznes oqytý jobalarynda qarastyryp olardyń satylý múmkindikterin joǵarlatýǵa bolatynyn kórsetti.
- Biz «Jasandy intellekt arqyly oqytý» taqyrybyn tańdadyq. Bizdiń sheshimimiz neirondyq jelini mobildi qosymshaǵa biriktirý bolyp tabylady, - dep bólisti pavlodarlyq ziiatker Sabyr Berikuly.
- Joǵary synyp oqýshylaryna bolashaq mamandyqty tańdaý ońaiǵa túspeidi. Biz bul týraly erterek oilanýdy usynamyz. Bizdiń qosymshanyń maqsaty- 7-8 synyptardan bastap birneshe pánderdiń túiisken jerinde oqytý. Qosymsha arqyly paidalanýshy sońǵy synyptyrda kerekti bilim jinap aerospeisinjenering, biorobotiks, bioinjenering jáne basqa da álemde suranysqa ie mamandyqtar týraly tolyq túsinikke ie bola alady,- dep túsindirdi «Shyraq» jobalaryn óskemendik oqýshylar Shyńǵys Maǵaýiia men Erkejan Erlanqyzy.
Hakatonnyń jabylý saltanatynda IT- salasynyń bilikti mamandarynan quralǵan qazylar alqasy úzdik komandalardy anyqtap, jeńimpazdardy marapattady.
