23 maýsym – Qazaqstanda Memlekettik qyzmetshiler kúni. Bul kún memlekettik basqarý júiesinde eńbek etip júrgen myńdaǵan mamannyń kásibiligi men qoǵam aldyndaǵy jaýapkershiligin aishyqtaityn mereke retinde atalyp ótedi, dep habarlaidy dalanews.kz.
Memlekettik qyzmet – memlekettiń turaqty damýy men azamattardyń ál-aýqatyn arttyrýǵa baǵyttalǵan mańyzdy institýttardyń biri. Memlekettik qyzmetshiler kún saiyn halyqtyń áleýmettik máselelerin sheshýge, memlekettik baǵdarlamalardy júzege asyrýǵa, qoǵamdyq turaqtylyqty qamtamasyz etýge jáne azamattarǵa sapaly qyzmet kórsetýge úles qosyp keledi.
Qazaqstanda Memlekettik qyzmetshiler kúni 2013 jylǵy Qazaqstan Respýblikasy Prezidentiniń Jarlyǵymen bekitildi. Al 2014 jyldan bastap resmi túrde atalyp ótýde. Bul merekeniń belgilenýi Birikken Ulttar Uiymynyń bastamasymen úndes. Óitkeni 2002 jyly BUU Bas Assambleiasy 23 maýsymdy Memlekettik qyzmet kúni dep jariialap, uiymǵa múshe elderdi atalǵan kúndi ulttyq deńgeide atap ótýge shaqyrǵan bolatyn.
Búginde memlekettik qyzmet salasy jańa damý kezeńine qadam basty. Qazirgi zaman memlekettik apparattan tek kásibilikti ǵana emes, sonymen qatar ashyqtyqty, jedeldikti jáne azamattardyń suranysyna der kezinde jaýap berýdi talap etedi. Osyǵan bailanysty elimizde memlekettik qyzmet júiesin jetildirýge baǵyttalǵan aýqymdy reformalar júzege asyrylyp keledi.
Qazaqstanda memlekettik qyzmettiń negizgi qaǵidattary men jumys tártibi «Memlekettik qyzmet týraly» Zańmen retteledi. Qujat memlekettik qyzmetke qabyldaý, qyzmettik ósý, memlekettik qyzmetshilerdiń quqyqtary men mindetteri sekildi mańyzdy máselelerdi qamtidy.
2024 jyly Memlekettik qyzmetti damytýdyń 2024–2029 jyldarǵa arnalǵan jańa tujyrymdamasy bekitildi. Qujattyń basty maqsaty – adam múddesin birinshi orynǵa qoiatyn memlekettik qyzmettiń servistik modelin qalyptastyrý.
Tujyrymdama aiasynda memlekettik apparatty kásibilendirý, zamanaýi HR-tehnologiialardy engizý jáne tsifrlyq sheshimderdi keńinen paidalaný kózdelgen. Bul bastamalar Memleket basshysy usynǵan «Halyq únine qulaq asatyn memleket» tujyrymdamasyn iske asyrýǵa baǵyttalǵan.
Sondai-aq Qazaqstan memlekettik qyzmettiń gibridti modeline kóshýde. Bul model mansaptyq jáne pozitsiialyq júielerdiń tiimdi tustaryn biriktirip, memlekettik qyzmetke ártúrli salada tájiribesi bar mamandardy tartýǵa múmkindik beredi. Sonyń nátijesinde memlekettik apparatqa biznes, meditsina, bilim berý, aýyl sharýashylyǵy jáne basqa da salalardan bilikti kadrlar kelip, basqarý sapasynyń artýyna yqpal etpek.
Memlekettik qyzmetti damytýda úzdiksiz bilim alý men kásibi jetildirýge erekshe kóńil bólinýde. Qyzmetkerlerdiń oqý baǵdarlamalary men taǵylymdamalarǵa qatysýy qoldaý taýyp, biliktilikti arttyrýdyń turaqty tetikteri qalyptastyrylmaq. Bolashaqta qyzmetkerlerdiń eńbekaqysy olardyń kásibi jetistikterimen jáne ózin-ózi damytýǵa degen umtylysymen tyǵyz bailanysty bolady.
Áleýmettik kepildikterdi kúsheitý de reformalardyń mańyzdy bóligi sanalady. Zań jobasynda memlekettik qyzmetshilerdiń eńbek quqyqtaryn qorǵaý máseleleri qamtylǵan. Atap aitqanda, demalys jáne mereke kúnderi atqarylǵan jumys úshin mindetti túrde ótemaqy tóleý, eńbek ótiline qarai qosymsha demalys berý jáne basqa óńirge qyzmettik aýysý kezinde otbasylardy qoldaý tetikterin engizý josparlanǵan.
Memlekettik qyzmettiń tiimdiligi tek zańdar men reformalarǵa ǵana emes, sonymen birge qyzmetkerlerdiń kásibi ádebi men jaýapkershiligine de bailanysty. Osy rette Ádep jónindegi ýákilder institýtynyń róli erekshe. Olar memlekettik qyzmetshilerge keńes berip, qyzmettik ádep normalaryn saqtaýǵa kómektesedi, quqyq buzýshylyqtardyń aldyn alýǵa yqpal etedi.
Statistika
Búginde Qazaqstannyń memlekettik qyzmet júiesinde 84 myńnan astam maman eńbek etedi. Olardyń ortasha jasy 40-ty qurasa, eńbek ótili shamamen 12 jylǵa teń. Memlekettik qyzmetshilerdiń 55,8 paiyzyn áielder quraidy. Memlekettik apparatta 900-den astam erekshe qajettiligi bar azamat eńbek etedi. Bul kórsetkishter memlekettik qyzmettiń qoǵamdaǵy mańyzdy rólin jáne onyń kadrlyq áleýetiniń joǵary ekenin kórsetedi.
Elimizde úsh aida 74,8 mln memlekettik qyzmet kórsetilgen
Búginde memlekettik qyzmet kórsetý sapasyn arttyrý baǵytynda da aýqymdy jumystar júrgizilýde. Biylǵy jyldyń alǵashqy úsh aiynda ǵana qazaqstandyqtarǵa 74,8 millionnan astam memlekettik qyzmet kórsetilgen. Onyń ishinde 54,9 millionnan astam qyzmet ortalyq memlekettik organdar arqyly, 19,9 millionnan astamy jergilikti atqarýshy organdar arqyly usynylǵan. Al «Azamattarǵa arnalǵan úkimet» memlekettik korporatsiiasy arqyly 3,9 million memlekettik qyzmet kórsetildi.
Halyq arasynda eń kóp suranysqa ie qyzmetterdiń qatarynda jeke kýálikterdi rásimdeý, kólik quraldaryn tirkeý, júrgizýshi kýálikterin berý, jyljymaityn múlik quqyqtaryn tirkeý jáne basqa da áleýmettik mańyzy joǵary qyzmetter bar.
Qazirgi tańda memlekettik qyzmettiń basty maqsaty – halyqqa qolaily jaǵdai jasaý, azamattardyń ótinishterine jedel jaýap berý jáne memlekettik qyzmetterdi sapaly usyný. Bul baǵytta qoǵamdyq baqylaý da kúsheiip keledi. Memlekettik qyzmet kórsetý sapasyn baǵalaý maqsatynda halyqqa qyzmet kórsetý ortalyqtarynda turaqty monitoringter júrgizilip, azamattardyń pikirleri men usynystary nazarǵa alynýda.
Memlekettik qyzmet – jai ǵana jumys emes, qoǵam aldyndaǵy úlken jaýapkershilik. Sondyqtan memlekettik qyzmetshilerdiń kásibiligi, adaldyǵy jáne halyq múddesine qyzmet etýge degen umtylysy eldiń damýy men memlekettik basqarý júiesiniń tiimdiligin aiqyndaityn negizgi faktorlardyń biri bolyp qala beredi.
