Abai oblysy Úrjar aýdanynda ajal qushqan 23 jastaǵy áskeri qyzmetker Rahat Raibektiń týystary tergeýdiń ádil júrgizilmegenin aityp, dabyl qaǵýda. Sózderinshe, qylmystyq is jan-jaqty zerttelmegen ári kúdiktilerdiń barlyǵy qamaýǵa alynbaǵan, dep habarlaidy Dalanews.kz.
31-arnanyń Informbiýro jańalyqtar baǵdarlamasynyń málitmetinshe, qańtarda Rahat Raibek Úrjar aýdandyq qorǵanys isteri jónindegi bólimine jumysqa ornalasady. On kúnnen keiin 23 jastaǵy áskeri qyzmetker áriptesterimen týǵan kún toilaýǵa ketedi. Sol túni aýyldaǵy dúkenniń mańynan onyń máiiti tabylǵan.
Aiyptaý aktisine sáikes, áskeri komisariattyń qyzmetkeri pyshaq jaraqatynan mert bolǵan.
“Oqiǵa negizi voenkomat ǵimaratynda bastalǵan. Baýyrymdy sol qyzmetkerler týǵan kúnge shaqyryp alady. Voenkomat ǵimaratynda otyrys bolǵan. Sol otyrystan keiin baýyrym qaitqan joq. Iaǵni, sol voenkomat ǵimaratynan qaitpady, óligi ǵana keldi”, – dedi marqumnyń ápkesi Sholpan Muhamedjanova.
Marqumnyń ápkesi inisin asa qatygezdikpen pyshaqtap óltirgenderdiń barlyǵy qamaýǵa alynbady dep otyr. Oǵan qosa, tergeýdiń jan-jaqty júrgizilmegenine senimdi. Sot-meditsinalyq saraptamasynyń qorytyndysymen de kelispei, qylmystyq istiń babyn aýystyrýdy talap etedi.
“Eńgezerdei jigitke bir adam 22 jerden pyshaq salýy múmkin emes. Ekinshiden, osy qylmysty jasyryp otyrǵan birneshe tulǵa bar. Olar da is boiynsha jai kýá retinde júrgizilip otyr. Olardy kúdiktiler qataryna ótkizý kerek. Is 99-baptyń 1-tarmaǵy boiynsha qarastyrylyp jatyr. Ony 2-tarmaqqa, iaǵni “Asa qatigezdikpen óltirý” dep aýystyrýdy talap etemiz”, – dedi marqumnyń ápkesi.
Derekkózdiń málimetinshe, atyshýly iste jalǵyz aiyptalýshy bar. Ol áskeri komisariattyń júrgizýshisi eken.
Almaty agrarlyq ýniversitinde oqyǵan Rahat Raibek úilenbegen. Otbasynyń jalǵyz balasy bolǵan. Qorǵanys salasynda jumys istep, áskeri qyzmetker bolýdy armandaǵan kórinedi.
