اباي وبلىسى ءۇرجار اۋدانىندا اجال قۇشقان 23 جاستاعى اسكەري قىزمەتكەر راحات رايبەكتىڭ تۋىستارى تەرگەۋدىڭ ءادىل جۇرگىزىلمەگەنىن ايتىپ، دابىل قاعۋدا. سوزدەرىنشە، قىلمىستىق ءىس جان-جاقتى زەرتتەلمەگەن ءارى كۇدىكتىلەردىڭ بارلىعى قاماۋعا الىنباعان، دەپ حابارلايدى Dalanews.kz.
31-ارنانىڭ ينفورمبيۋرو جاڭالىقتار باعدارلاماسىنىڭ مالىتمەتىنشە، قاڭتاردا راحات رايبەك ءۇرجار اۋداندىق قورعانىس ىستەرى جونىندەگى بولىمىنە جۇمىسقا ورنالاسادى. ون كۇننەن كەيىن 23 جاستاعى اسكەري قىزمەتكەر ارىپتەستەرىمەن تۋعان كۇن تويلاۋعا كەتەدى. سول ءتۇنى اۋىلداعى دۇكەننىڭ ماڭىنان ونىڭ ءمايىتى تابىلعان.
ايىپتاۋ اكتىسىنە سايكەس، اسكەري كوميسارياتتىڭ قىزمەتكەرى پىشاق جاراقاتىنان مەرت بولعان.
“وقيعا نەگىزى ۆوەنكومات عيماراتىندا باستالعان. باۋىرىمدى سول قىزمەتكەرلەر تۋعان كۇنگە شاقىرىپ الادى. ۆوەنكومات عيماراتىندا وتىرىس بولعان. سول وتىرىستان كەيىن باۋىرىم قايتقان جوق. ياعني، سول ۆوەنكومات عيماراتىنان قايتپادى، ولىگى عانا كەلدى”، – دەدى مارقۇمنىڭ اپكەسى شولپان مۇحامەدجانوۆا.
مارقۇمنىڭ اپكەسى ءىنىسىن اسا قاتىگەزدىكپەن پىشاقتاپ ولتىرگەندەردىڭ بارلىعى قاماۋعا الىنبادى دەپ وتىر. وعان قوسا، تەرگەۋدىڭ جان-جاقتى جۇرگىزىلمەگەنىنە سەنىمدى. سوت-مەديسينالىق ساراپتاماسىنىڭ قورىتىندىسىمەن دە كەلىسپەي، قىلمىستىق ءىستىڭ بابىن اۋىستىرۋدى تالاپ ەتەدى.
“ەڭگەزەردەي جىگىتكە ءبىر ادام 22 جەردەن پىشاق سالۋى مۇمكىن ەمەس. ەكىنشىدەن، وسى قىلمىستى جاسىرىپ وتىرعان بىرنەشە تۇلعا بار. ولار دا ءىس بويىنشا جاي كۋا رەتىندە جۇرگىزىلىپ وتىر. ولاردى كۇدىكتىلەر قاتارىنا وتكىزۋ كەرەك. ءىس 99-باپتىڭ 1-تارماعى بويىنشا قاراستىرىلىپ جاتىر. ونى 2-تارماققا، ياعني “اسا قاتىگەزدىكپەن ءولتىرۋ” دەپ اۋىستىرۋدى تالاپ ەتەمىز”، – دەدى مارقۇمنىڭ اپكەسى.
دەرەككوزدىڭ مالىمەتىنشە، اتىشۋلى ىستە جالعىز ايىپتالۋشى بار. ول اسكەري كوميسارياتتىڭ جۇرگىزۋشىسى ەكەن.
الماتى اگرارلىق ۋنيۆەرسيتىندە وقىعان راحات رايبەك ۇيلەنبەگەن. وتباسىنىڭ جالعىز بالاسى بولعان. قورعانىس سالاسىندا جۇمىس ىستەپ، اسكەري قىزمەتكەر بولۋدى ارمانداعان كورىنەدى.
