Aldaǵy jyldary Qazaqstan ýrbanizatsiiaǵa odan saiyn ushyrai túsedi. 2050 jyly el halqynyń teń jartysy basty úsh qala - Astanada, Almatyda jáne Shymkentte turady. Mundai boljamdy esep-qisappen Eńbek jáne halyqty áleýmettik qorǵaý ministrligi Eńbek resýrstaryn damytý ortalyǵy bólisti, dep jazady Dalanews.kz.
Atalǵan ortalyqtyń Boljaý jáne zertteý departamentiniń sarapshylary týý, ólim jáne kóshi-qon kórsetkishteri negizinde demografiialyq boljamyn daiyndady.
"Taldaýǵa sáikes, 2030 jylǵa qarai Qazaqstannyń qala halqynyń sany 13% - ǵa artyp, 14 mln adamǵa jetedi, al 2050 jylǵa qarai 57% - ǵa ósip, 19,3 milliondy quraidy. Sonymen birge, 2030 jylǵa qarai aýyl halqynyń sany tek 1%-ǵa, 7,7 mln adamǵa deiin, al 2050 jylǵa qarai-shamamen 9%-ǵa, 8,2 mln adamǵa deiin ósedi", delingen habarlamada.
Boljam boiynsha, qala halqynyń sany 2030 jylǵa qarai bazalyq stsenarii kezinde Astana qalasynda – 538,3 myń adamǵa nemese 39%-ǵa, 1,9 mln adamǵa deiin, Almaty qalasynda – 469,3 myń adamǵa nemese 21% - ǵa, 2 mln 664 myń adamǵa deiin, Shymkent qalasynda –209,6 myń adamǵa nemese 17% - ǵa ósedi, nátijesinde 1 mln 416 myń adamǵa jetedi. Bul rette úsh megapolistiń halqy qala halqynyń jalpy sanynyń 43%-yn quraityn bolady, al 2050 jylǵa qarai bul kórsetkish 51%-ǵa deiin ulǵaiady.
Budan basqa, óńirlik bóliniste qala halqy Mańǵystaý oblysynda 79,2 myń adamǵa, Aqtóbe oblysynda 70,3 myń adamǵa, Túrkistanda 62,4 myń adamǵa ósedi. Bul rette Shyǵys Qazaqstan, Soltústik Qazaqstan jáne Pavlodar oblystarynda qala halqynyń sany azaiýy múmkin.
2030 jylǵa qarai aýyl halqynyń ósimi 2023 jylmen salystyrǵanda tek bes óńirde kútiledi:
- Almaty oblysynda 140,8 myń adamǵa,
- Túrkistanda 94,7 myń adamǵa,
- Mańǵystaýda 58,1 myń adamǵa,
- Qyzylorda oblysynda 26 myń adamǵa
- Atyraýda 21,5 myń adamǵa.
2030 jylǵa qarai aýyl halqynyń edáýir azaiýy Qostanai oblysynda, Abai oblysynda jáne Soltústik Qazaqstan oblysynda boljanyp otyr, onda azaiý tiisinshe 37,1 myń, 35,2 myń jáne 33,8 myń adamdy quraidy.
2050 jylǵa qarai ERDO taldaýshylarynyń esepteýlerine sáikes, boljamnyń bazalyq nusqasy kezinde Mańǵystaý oblysy megapolisterdi eseptemegende qala halqynyń ósimi boiynsha kóshbasshy bolady.
Óńir qalalarynda 736,6 myń adam turady, bul 2023 jylmen salystyrǵanda 384 myńǵa nemese 2,1 ese kóp. Túrkistan oblysynda ósim 355 myń adamdy quraidy, bul 878,7 myń adamǵa deiin, iaǵni 1,7 ese ósýge sáikes keledi. Aqtóbe oblysynda qala turǵyndarynyń sany 307 myń adamǵa ósip, 1 mln adamdy quraidy (2023 jylǵa qarai+44%). Qala turǵyndary sanynyń azaiýy Pavlodar, Shyǵys Qazaqstan jáne Soltústik Qazaqstan oblystarynda boljanady, tiisinshe 7%, 6% jáne 5%-ǵa qysqarady.
"Aýyl halqynyń sany Qazaqstannyń ońtústik jáne batys óńirlerinde ósedi. Almaty oblysynda ósim 658 myń bolyp 1 mln 931 myń adamǵa jetedi, bul 2023 jylǵy kórsetkishten 52% - ǵa artyq. Túrkistan oblysynda aýyl halqy 495,2 myńǵa deiin ósip, 2 mln 102 myń adamdy quraidy. Mańǵystaý oblysynda aýyl halqynyń sany 2050 jyly 709 myń adamdy quraýy múmkin, bul 2023 jylmen salystyrǵanda 284,7 myńǵa kóp", - deidi sarapshylar.
Aýyl turǵyndary sanynyń eń kóp azaiýy Qostanai oblysynda kútilýde – 163,6 myń adamǵa qysqaryp 151,7 myń adamdy quraidy, bul 2023 jylmen salystyrǵanda 52% - ǵa az. Abai oblysynda 149,6 myń adamǵa azaiyp, halyq sany 87,6 myń adamdy quraidy. Soltústik Qazaqstan oblysynda aýyl halqynyń sany 2050 jylǵa qarai 141,6 myń adamǵa qysqaryp, 131,3 myń adam bolady.
