Halyqaralyq valiýta qorynyń (HVQ) boljamyna sáikes, 2031 jylǵa qarai Qazaqstanda jan basyna shaqqandaǵy jalpy ishki ónim (JIÓ) 25,54 myń dollarǵa jetýi múmkin. Bul kórsetkish boiynsha Qazaqstan aimaqtaǵy elderdiń arasynda birinshi orynǵa shyǵýy yqtimal, dep habarlaidy dalanews.kz.
HVQ-nyń 2026 jylǵy qazanda jariialanǵan «Álemdik ekonomikanyń damýyna sholý» (World Economic Outlook) baiandamasynda Qazaqstannyń nominaldy jalpy ishki ónimi 397,92 mlrd dollarǵa baǵalanǵan. Boljam boiynsha, 2026 jyly Qazaqstanda jan basyna shaqqandaǵy JIÓ 19,31 myń dollardy quraidy. Al 2031 jylǵa qarai bul kórsetkish 25,54 myń dollarǵa deiin ósýi múmkin.
Aimaqtaǵy elderdiń kórsetkishteri
HVQ boljamynda 2026 jáne 2031 jyldarǵa arnalǵan jan basyna shaqqandaǵy JIÓ kórsetkishteri mynadai:
- Qazaqstan: 19,31 myń dollar / 25,54 myń dollar;
- Resei: 19,95 myń dollar / 18,67 myń dollar;
- Túrikmenstan: 12,29 myń dollar / 16,11 myń dollar;
- Grýziia: 11,23 myń dollar / 17,92 myń dollar;
- Armeniia: 10,66 myń dollar / 14,49 myń dollar;
- Ázerbaijan: 8,5 myń dollar / 9,76 myń dollar;
- Ýkraina: 7,08 myń dollar / 8,97 myń dollar;
- Ózbekstan: 4,58 myń dollar / 7,13 myń dollar;
- Qyrǵyzstan: 3,62 myń dollar / 4,88 myń dollar;
- Tájikstan: 2,01 myń dollar / 2,74 myń dollar.
Kórsetkishterge súiensek, 2026 jyly jan basyna shaqqandaǵy JIÓ kólemi boiynsha Resei Qazaqstannan sál joǵary tur. Alaida HVQ boljamy boiynsha, 2031 jylǵa qarai Reseidegi bul kórsetkish 18,67 myń dollarǵa deiin tómendeýi múmkin. Al Qazaqstanda ósim jalǵasyp, 25,54 myń dollarǵa jetedi dep kútiledi.
Osylaisha, boljam júzege assa, 2031 jyly Qazaqstan jan basyna shaqqandaǵy nominaldy JIÓ kólemi boiynsha atalǵan aimaq elderiniń arasynda kósh bastaidy.
